Shillong, Jylliew 20:
Ka Sorkar Jylla kan sa pynmih kyndon thymmai halor ki khajna ïa ki kali kamai kynthup ïa ka rukom kamai kaba thymmai da ki ar shaka.
Ka Sorkar lyngba ka tnat Transport ka dang pynkhreh ban pynmih ïa ka jingpynbna haba ïadei bad ki khajna na ka Permit, Road Tax, bad ka bai kali ïa kiba shong da ki kali kamai.
Bun bha ki paidbah ki la hap shaniah ban shong da ki kali ar shaka ha nongbah Shillong khamtam namarba ka jur ka dheng kali, bad kine ki ar shaka kim dei kiba la ithuh kum ki kali kamai bad kim pat siew khajna.
Kham mynshwa ki don ki ar shaka kiba kamai da kaba pynrung kyrteng ha ka kampani bad la tip kum ka Rapido. Hynrei mynta bun ki bym ïaid shuh kum ka Rapido bad ki la kamai kumto khlem ‘permit’ bad khlem siew khajna kumba siew ki taksi bad kiwei kiwei ki kali kamai.
