Nongpoh, Jylliew 21:
Ka Ri Bhoi Youth Federation (RBYF) Mawhati Circle ka pynpaw ïa ka jingsngewkhia halor ka jingleh mynthi ka sorkar jylla ha kaba ïadei bad ka thanat Umsohlait kaba la shu ieh shrah haduh mynta mynne naduh ba la plie paidbah ha u snem 2017 da u Bah HDR Lyngdoh (Bam Kwai ha Dwar U Blei) uba long u Myntri ka tnat Kam Pohïing ka jylla ha kito ki por.
Ha ka kyrwoh khubor ba la pyllait da u President samla Reynold Dkhar u la ong, kumba long mynta, katei ka thanat la pyndonkam tang ha ki lai tylli ki kamra kiba rit jong ka Village Employment Council (VEC) jong ka shnong Umsohlait. Kum ka seng ka la kynthoh ba kane ka long kum ka jingibeiñ ïa katei ka thaiñ bad ka long ruh ka jingjah burom ruh ïa ka tnat pulit hi baroh kawei.
Ka seng ka la kynnoh ruh ba ka jingbym shimkhia jong ka sorkar jylla ban thaw ïa ka thanat kaba pura ha katei ka thaiñ mynta la hynñiew snem da kaba shu pyndonkam sah ïa ka kamra jong ka VEC ka long ruh ka jingleh shiliang khmat jong ka sorkar jylla. Kane ka wan ruh wat hadien na ka liang ka seng ka la dep ban buh jingthoh sha ka Deputy Commissioner barim jong ka Ri Bhoi, ka Kong RM Kurbah na ka bynta ban shimkhia halor kane ka kam, hynrei kane ruh ka khlem poi shaei-shaei.
Kum ka seng ka la ong lada kan ïai long sah kumne, kam don jingmut satia ïa kane ka thanat ba kan don namar kam ai jingmyntoi ïa ki paidbah ka thaiñ. Namar kata, kum ka seng kan ban hap ban shim da ki sienjam kiba tyngeh lada ka sorkar jylla ka dang ïai kuman halor kane ka bynta.
Ha kawei ka bynta, ka seng ka pynpaw pat ïa ka jingsngewnguh ïa u MLA barim ka thaiñ, u Bah Julius Dorphang namar ba dei ha ka por jong ka jinglong nongmihkhmat ka jong u la lah ban wanrah ïa kane ka thanat kaba la pynkmen shikatdei ïa ki paidbah. Pynban naduh ba u rem noh ïa katei ka thanat la shu ieh shrah kumto kat haduh mynta.
Ha kajuh ka por na ka liang ka seng ka buh ruh ïa ka jingkyntu ïa u nongmihkhmat ba mynta ka Mawhati, u Bah Charles Marngar ba u dei ban shim khia ban ïakren bad ka sorkar jylla halor kane ka mat na ka bynta ka jingmyntoi jong ki paidbah ka thaiñ Mawhati hi baroh kawei.
Halor kane ka bynta, ka seng ka ai por shi taïew ïa ka sorkar jylla ba kan jubab bad leh ïa kaba donkam halor kane ka mat. Lada ka sorkar jylla kam jubab eiei ne leh mynthi, ka seng kan sa pynlong ïa ka jingshong kyllaiñ mungor kaba shi sngi. Hadien kata kan sa leit ban khang tala syndon ïa katei ka thanat, la pynkut ka kyrwoh.
