Shillong, Jylliew 21:
U Myntri Rangbah ka Jylla, Conrad K Sangma u la pynlong ka jingïakren bad baroh ki Deputy Commissioner jong ki district bapher bapher ka Jylla lyngba ka video conferencing namar ka jingbteng ban hap slap, bad ka jingshah lynshop ha kine ki sngi. Kumta u la bthah ïa ki bor district ban peitngor bad pynkhreh lypa ban pynbiang ïa ki jingdonkam lada mih kano kano kaba long kyrkieh.
Nalor ki Deputy Commissioner, la don lang ruh ki heh ophisar kiba peit ïa ki tnat treikam bapher bapher ka Sorkar Jylla ha kaba u la kyntu ban shimkhia namar ki jingpynjulor kiba jia na ka jingjur u slap bad ki lad jingïarap ïa kiba shahktah.
Nangta, u la pyntip ba ka jingïalang ka la pynlong ïakren ïa ki jingdonkam kiba hap ban pynkhreh ha ki sngi ban dang wan namar ka la don ka jingbatai lypa ba ka Jylla kan ïoh ïa u slap bajur bha.
U Myntri Rangbah u la ong ba ki Deputy Commissioner lem bad ki tnat treikam bapher bapher kin ïasnoh kti lang ban khmih ïa ki jingjulor kiba wan jia na ka jinghap slap kaba khlem sangeh ha kaba la don ruh ka jingduh ïa ki mynsiem briew.
Ha kine ki sngi naduh ba hap u slap bajur, la sakhi ïa ka jingtwa ha kylleng bad jingshlei um ha kaba ki wah ruh ki la shlei bad tuid palat ia u laiñ la jingma.
Ki don ruh ki briew kiba la shahrong ha ki wah heh ha ka por ba ki leit khwai doh. Ka jingjulor ki surok bad jingdon jingem ka la jur bha hynrei ka Sorkar ka dang lum jingkheiñ ka kita.
