Shillong, Jylliew:
Kum ka dak ban ai khublei ïa ka jingtrei shitom ki pulit pynïaid kali ha ka nongbah, ka Frank Motors ha ka sngi Ba-ar ka la leit ban noh synñiang da ki jaiñ jri ban ïada na u slap haduh 300 tylli sha ka tnat Shillong Traffic Police.
“Namar ba ka aïom lyiur ka la wan, ki pulit pynïaid kali ruh ki hap ban shah ïa u slap, ka lyer bad shem jingeh shibun ban pyndep ïa ka kam ha ka rukom kaba janai bad dei halor kane, ba na ka liang ka Frank Motors kala synñiang da 300 tylli ki rain coat ne ki jaiñ jri sha ka tnat Shillong Traffic Police,” ong u CEO ka Frank Motors u Bah Indonlang Passah.
“Ngim lah ban siew kylliang da ki kyntien, hynrei ngin ïai kyrshan ïa ki pulit pynïaid kali da ka jingai sngewbha da ki jaiñ jri khnang ba ki pulit ruh kin lah ban trei ïa la ka kam khlem ka jingshah pynthut ha u slap,” u la ong.
“Ngi la jied kyrpang da ki IGNYTE Rain Coat kiba 10,000 mm bad kine ki Rain Coat ym tang ki ïada na u slap hynrei ki ïada ruh na ka lyer khnang ba ki pulit kin lah ban trei ïa ka kam bad leit phai sha la ki ïing bad ki ba ieit ba thoiñ hapdeng ka met ka phad kaba koit,” u la ong.
Ïa kine ki IGNYTE Rain Coat, la aiti da u CEO ka Frank Motors sha u Superintendent of Police (Traffic) u Dr. Dara Aswaghosh ha ka jingdon lang u SP ka East Khasi Hills u Bah Sylvester Nongtnger bad ruh u Deputy SP (Traffic) u Bah Mac Joel Marngar.
