Shillong, Jylliew 21:
U Lat ka Jylla u la pynmih ïa ka jingbthah ïa ki tnat treikam ka Sorkar ba ki dei ban weng kam noh ïa kito ki nongtrei kiba la kynjoh sha 70 snem ka rta.
Kane ka jingbthah ka la mih ruh ha ka por ba ka jingïakren ka la ïaid sharum-shaneng halor ka jingthung kam ka tnat Meghalaya Urban Development Authority (MUDA) ïa u Chief Engineer uba la kynjoh 78 snem ka rta.
Nalor kane, ki la mih ruh ki jingïakren ba ki don ki tnat kiba la thung kam ïa ki briew kiba la dep shongthait la slem bha. Kumta na ka liang u Lat ka Jylla u la pynmih ïa ka jingpynbna ba ki briew kiba la kynjoh ïa ka 70 snem kim dei shuh ban dang shah thung kam ne thung kam biang.
Namar kata, u la bthah ïa baroh ki tnat Sorkar/Agency jong ka Sorkar Jylla kiba la ai kam ne thung kam biang ïa ki briew ba la kynjoh sha ka rta kaba 70 snem ba kin weng noh shi syndon ïa ki.
