Shillong, Jylliew 21:
U Chief Executive Member (CEM) barim ka Khasi Hills Autonomous District Council (KHADC), Bah Titosstarwell Chyne u la kynnoh ba ki don katto-katne ngut ki MLA haba ki la rung sha ka NPP ki la rung ryngkat ki kyndon ba dei ban pynhap noh na ka shuki CEM ïa nga.
“Ki katto-katne ki MLA kiba la angnud ban pynhap ïa nga na ka shuki CEM namar ki sngewthuh ba ka jingdon jong nga kum u CEM kan dei ka jingma ïa ki,” la ong u Bah Titos haba kren sha ki lad pathai khubor ha ka Sngi Balang.
U Bah Titos uba la shimti mynta kum u Nongïalam ka Liang Pyrshah ha KHADC, u la ong ba na ki dak ki shin ka don ka jingbthah na ki nongïalam ka NPP ba dei ban pynhap noh ïa u na ka shuki CEM.
Shuh shuh u la ong ba ki don ki MLA ba mynta ha shwa ban rung sha ka NPP ruh ka kyndon kaba nyngkong ba ki buh ka dei ban pynhap ïa u na ka shuki CEM. Nangta u la ong ruh ba kane ka jingpynhap ïa u na ka shuki CEM kan nym dei satia ka jingduhnong na ka bynta jong u, hynrei ka jingduhnong kan dei ïa ka district council.
Nalor kata, u Bah Titos u la ong ruh ba ki don ki MLA kiba sheptieng ïa ka jinglong CEM jong u, bad um tip balei ki tieng namar haba u shong ha ka shuki CEM kam dei ba un pyntieng briew, hynrei ban trei ban wanrah ïa ki aiñ ba ïadei bad ka riti ka dustur.
Ha kaba ïadei pat bad ka jingpynpaw ka Congress ba ka jingkyrshan ïa ka NPP ka dei ban pyllait na ka jingwan synshar u Lat, u Bah Titos u la ong ba kane ka jingaidaw ka long ka bym don nongrim ban ong wan synshar u Lat ne kata ka ‘Administrator Rule’, ka dei ka nia jinghap ne ka nia khyllung, ki paidbah ki sngewthuh.
“Ka jingwan jong ka synshar administrator hapoh ka district council kan dei tang lada don ka jingbym lah ban thaw EC ne lada ym biang ka number ne kata ka political crisis bad ruh ka financial crisis,” la ong u Bah Titos.
