Shillong, Jylliew 21:
U Deputy Chairman ka Khasi Hills Autonomous District Council (KHADC), Bah Charles Marngar bad uba dei ruh u MDC ka Mawhati konstitwensi, u la pynpaw ba ha kine ki saw snem shiteng haba u shong ha ka liang pyrshah baroh ki CEM kiba la leit ki shu kut tang ha jingkular, hynrei ym don ba shim khia ban hiar dalade sha khappud ban sngap ïa ka jingeh ki paidbah.
Haba ïakren bad ki nongthoh khubor ha kamra treikam mar shu shimti kum u Deputy Chairman, u la ong ba u CEM ba mynta (Bah Pyniaid Syiem) u la kular ban leit jurip ïa ki shnong ha khappud khamtam ha konstitwensi jong u ha shwa ba ka samoi treikam kan kut noh.
Nangta, u la ïathuh ba u Bah Pynïaid u la kular ba hadien artaïew ba la dep thaw ïa ka EC un sa lum jingïalang ban hiar sha khappud bad ka jylla Assam ban leit jurip ïa ki shnong.
“Nga kyrmen ha kine ki 6 bnai ba nga shong ha kane ka shuki, ngan buddien ïa ka EC bad ïa u CEM ba kin pynurlong ïa kane ka jingdawa jong nga bad ïa kiwei de ki kam na ka bynta ka jingmyntoi jong ka jaidbynriew” u la ong.
Shuh shuh u la pynpaw ba ha kane ka jinglong MDC jong u, u kwah ba kane ka jingpynbeit ïa u pud kan urlong noh, namar lada la pynkylla noh ïa ka 6th Schedule lada ki MLA kim lah ban long MDC shuh kan pynsahnam ha kane ka por ba u dang long kum u MDC.
Wat la ki kylli balei ka Congress ka ïatreilang bad ka NPP ha KHADC, hynrei u la ong ba ha KHADC ka ïapher namar ka dei ban peit ïa ka khyndew ka shyiap bad ka riti dustur. Katba ha ka jylla ki shong ha ka liang pyrshah namar ki don ha kawei ka nongrim.
Haba phai hapoh ka ïingdorbar u Bah Charles u la shah jied da kaba suk kum u Deputy Chairman namar ym don mano-mano ba ïakhun pyrshah. La ïoh ruh ka jingkren ai khublei na ki MDC kynthup na u CEM bad u nongïalam ka liang pyrshah.
Ka jingjied thymmai ïa u Deputy Chairman ka dei hadien ka jinghiar shuki u Bah Alvin Sawkmie, MDC ka NPP na Mawsynram konstitwensi namar un leit noh kum u EM.
