Jowai, Jylliew 21:
Ki khynnah skul jong kawei na ki skul ha West Jaiñtia Hills District ki la pynlong ka jingïaid paidbah ha ka 21 tarik mynta u bnai ban pyrshah ïa ka jingshah thombor jong kawei ka khynnah kaba dang 12 snem rta.
Ki khynnah skul shynrang bad kynthei kiba ïashim bynta ha katei jingïaid paidbah ki la rah lang ïa ki placard ryngkat ki jingthoh pynrem bad dawa na ka sorkar ban shim khia halor kane ka kam namar kum kane ka jingjia kam dei shuh ban jia ïa kiwei-kiwei ki khynnah rit.
Kum ban shu pynkynmaw, ki bahaïing hasem jong katei ka khynnah ki la ujor da ka ejahar ha Women Police Station ha ka 16 tarik Jylliew pyrshah ïa u Enrysing Marbaniang, 31 snem rta, uba na Mairang, Eastern West Khasi Hills ba u thmu ban bat bor ïa katei ka khynnah ha ka 15 tarik Jylliew ha ka por kumba 6 baje janmiet.
La kynnoh ruh ba une u briew u la thombor ïa ka da kaba dat bad shoh pynmynsaw haduh ba kane khynnah kam tip briew shuh. Ha kajuh ka sngi ki pulit ki la kem noh ïa utei u briew bad mynta u don ha ka jingtohkit ka ïingbishar.
