Jowai, Jylliew 21:
Ka Joint Action Committee (JAC) kaba kynthup ïa ki saw seng- ka FKJGP, MPUF, JSU bad ka JPWO ki la lap ïa ka jingdkoh halor ka rukom pyntrei ïa ki skhim pynroi bapher bapher ha Nartiang Durga Temple.
Kane ka skhim dei kaba la mang da ka sorkar pdeng lyngba ka Prashad Scheme kaba tip kum ka “Prashad Scheme at Nartiang Shakti Peeth”.
Ki nongïalam ka JAC ba kynthup ïa u Bin Raliang Chairman JAC uba long ruh u President FKJGP Nartiang Area Unit, u Chalbestar Myria Secretary JAC, Education Secretary MPUF Central Body, u Andy Sumer General Secretary JSU Nartiang Circle, u Rimioo Nongtdu President ka JPWO West Jaiñtia ki la ong, ba ka tnat jngoh kai ka sorkar Jylla ha ka 19 tarik Risaw, 2020 ka la khot ‘tender’ na ka bynta ki jingtrei bapher bapher ha ka mang tyngka ba 4 klur tam bad la buh ruh ban pyndep hapoh 18 bnai. Kumta na ka daw bym lah kiar la pynjynsur noh shaduh u bnai Lber mynta u snem.
Nangta hadien ba ka por pyntrei ka la kut bad ruh namar bun ki jingtrei la lap ba shu trei torti ha kajuh ka por don kiba dang sahteng, kumta ka JAC ka la wad jingtip lyngba ka RTI bad ka sa lap ba don ka jyrsieh bamsap ba jur ha kaba ïadei bad kane ka skhim namar ba ka mang pisa bad ki jingpyntrei bapher bapher bala pyntrei kim ïahap satia.
Ki la kynnoh nalor bym ïahap ka rukom pyntrei bad ka mang pisa hynrei don ki jingtrei kiba khlem trei ei ei kiba la kot duna 2 klur tam kiba kynthup ïa ka Site Development with landscaping, drinking water, Solit waste Management, Resting Shed, Illumination Nartiang Monolith bad Illumination Nartiang Shakti Peeth.
Ka JAC ka ïathuh ba shwa kane ka la dep ai jingthoh sha u Lat ka Jylla, Asst Engineer ka MTDC Shillong, Managing Director ka MTDC Shillong, Commissioner & Secretary ka tnat jngoh kai ka sorkar Jylla, MLA ka thaiñ bad kiwei hynrei ym don ba shim khia halor kane ka kam.
