Mawkyrwat, Jylliew:
Ka KSU South West Khasi Hills District lyngba ka Education Cell da ka jingsngewkhia halor ki jingeh kiba lah ban ktah ïa ka pule puthi, ka la kyrpad ïa u Deputy Commissioner (DC) jong ka South West Khasi Hills ha kajuh ka por uba long ruh u District Disaster Management Authority ban pynkloi ki lad jingïarap ïa ka skul Khlur Rit Govt. LP School kaba don ha ka shnong Mawpud kaba la mad ïa ka jingshah pynjot ha ki bor jong ka mariang.
Kum ban shu kdew kane ka jingjia ka la jia ha miet shiteng synñia jong ka 14 tarik mynta u bnai namar ka jingther palat jong u slap ha kaba ka kynroh bad ka ïing shet ja jong ka Kong Jopcy Wanniang ka la twa bad leit ban ïa katei ka skul.
Kane ka skul hadien kane ka jingjia ka la hap ban mad ïa ki jingeh kaba la long ka jingduh kaba khraw khamtam ïa ki khynnah skul namar kam long shuh ban pynlong skul.
Ym tang katta, ka seng ka la ïoh jingtip ruh ba namar ka eksamin ka la jan, na ka liang ki nongpynïaid skul bad ki nonghikai kim banse ban pan kamra na ki ïing briew bad na ka ïing Anganwadi Centre ban ïoh pynlong skul ïa ki khynnah.
Namar kata, ka Education Cell jong ka KSU South West Khasi Hills District hadien ka jingud jingnam jong ki nongshong shnong, ka la kyrpad ïa u Deputy Commissioner ka South West Khasi Hills District ba un ai jingïarap noh kloi katba lah ïa katei ka skul lyngba ka Disasters Relief Fund lane kino-kino ki mang tyngka (scheme) ïa kane ka skul khnang ba ki khynnah kin nym duh ban leit skul bad ban thoh ïa ka eksamin jong ki bad ban weng ïa kane ka jingeh ha ka pule puthi hapoh katei ka shnong.
