Jowai, Jylliew 21:
U District Magistrate jong ka West Jaiñtia Hills District u la pyntreikam da ka Section 144 CrPC ha ka jaka ïakajia hapdeng ka shnong Maskut bad ka Tyrshang kiba hap hapoh ka Thadlaskeiñ C&RD Block.
Ïa kane ka hukum la pynmih hadien ba kitei artylli ki shnong ki la ïakajia na ka daw ka jingpom ïa ki dieng kseh ha ka jaka ba la tip kum ka Rashi Tyndem.
Kumta District Magistrate u la khang ban ïalum paidbah palat 5 ngut shaneng, ban rah ïa kino-kino ki tiar pynmynsaw da ki kynhun ne ki ’riewshimet, la khang ruh ban pom dieng, lane kit ïa ki mar khlaw na katei ka jaka ba ïakajia.
Kat kum ka hukum ba la pynmih da u District Magistrate, u la ong ba la don ar tylli ki Non FIR Case ba la ai sha ka ïing bishar jong u Executive Magistrate bad la phah soi ruh ïa ka jingïateh (Bond) hapoh ka Section 107 CrPC ïa ki waheh shnong jong kitei ar tylli ki shnong da kaba kular ban ym thaw kino-kino ki jingkulmar.
Kane ka hukum kan treikam mardor tat haduh ban da pynbna da kumwei.
