Shillong, Jylliew 21:
U Myntri Rangbah, Conrad K Sangma u la ong ba ka jinghap u slap ka la long ka jingkyrkhu ha kaba ki jaka pynmih bording ki la kham ïoh um, hynrei kaba donkam ka long ban don lypa ka jingpynkhreh ïa ka lawei khnang ba ha ki por ban wan, ka jingpynlip bording ilektrik kam nym ktah than.
Haba kylli halor ka jinglong jingman ka bording ilektrik ha Jylla, u Myntri Rangbah u la ong ba kaba donkam eh ka long ban shim ki sienjam mynta kum ka jingpynkhreh lypa khnang ba ka rukom pynlip bording ilektrik kan nym long kumba long mynta, namar lada don lypa ka jingpynkhreh, ha ka jaka ban pynlip bording kham bun kynta, ka jingpynlip kan kham duna noh ha ki por ban sa wan.
“Kumta ngi hap ban pyrkhat lypa ïa kane khnang ba ka jingpynlip bording kan long kaba ïabiang lang ym ban pynlip shisien pynlip bun kynta,” u la ong.
Hynrei u Conrad u khlem ïathuh kiei kita ki jingpynkhreh lypa ban pynduna ka ka jingpynlip bording ilektrik.
Katkum ba sngewthuh, ka tnat bording kam kwah ban weng noh shisien weng ïa ki kynta jong ka jingpynlip bording ilektrik, hynrei ka jingpynlip ding ilektrik kan treikam beit katto-katne kynta wat lada ka um ha ki jaka pynmih bording ilektrik ka la kham dap.
U Conrad u la ong ruh ba ka dei ha ka sien kaba nyngkong eh ha ka khana jong Jylla ba ki lai tylli ki thaiñ ki la donbynta ban pynmih bording ilektrik ha la kajong lajong ka jinglah jong ki ban pynmih, kaba la nang kham ïarap ïa ka Jylla ban ïoh ïa ka bording ilektrik.
U la ong ba ka Myntdu-Leshka projek ka pynmih bording na Rilum Jaiñtia, ka Ganol projek ka la lah teng ban pynmih na Rilum Garo bad ka Umïam Hydro projek na Khasi Hills.
Nalor kane, u la ong ba kine ki projek ki la donbynta ban pynmih bording bad ka Jylla ka donkam ban leh shibun kiei kiei haba ïadei bad ka jingpynmih bording.
Kumba ka long mynta, ka jingpynlip bording ilektrik ka dang ïai bteng wat lada ka um ha ki jaka pynmih bording ki la kham kiew bad kham lah ban pynmih.
