Mairang, Jylliew:
Kum shi bynta jong ka jingpyrman halor ki kam ïada mariang bad ka jingpyntreikam ïa kiba bun ki aiñ ïada mariang kiba kynthup ïa ka Environment Protection Act bad ka Biodiversity Act, ka shlem treikam jong u Range Forest Officer, Mairang Range ha ryngkat ka jingsynranlang jong ki bor pulit ka Eastern West Khasi Hills District ha ka 16 tarik Jylliew ki la leit ban jurip ïa ki kam thang rnga be-aiñ ha ki katto katne ki bynta jong ka distrik.
Katkum u kyrwoh khubor, la ong ba ha kane ka jingleit jurip la lap ïa ka jingthang rnga be-aiñ, ka jingkhaïi bad kit rnga be-aiñ ha kiba bun ki jaka khamtam ha ki thaiñ Sohjarang bad Pathar Lyndan na ka bynta ban pynpoi sha ki karkhana kiba don ha Ri-Bhoi. Ha kane ka sngi la ïoh ruh ban pynpra noh ïa katto katne ki jaka thang bad ki jaka ba lum thup ïa u rnga be-aiñ bad la ïoh ruh ban kurup ïa u rnga ba la thang be-aiñ. Wat hapdeng kiba bun ki diengpyngkiang kiba ka shlem ka ïakynduh na ka por sha ka por, ka shlem treikam jong u Range Forest Officer, Mairang Range lyngba ki snem, ka la ïai bteng ban pynlong ïa ka jingjurip bad jingkhynra ïa kiba kum kine ki jait kam be-aiñ.
Kane ka shlem ka la kyntu ruh ïa ki nongïalam shnong ka thaiñ ba kin ïatreilang ryngkat bad ka tnat Forest ban khanglad ïa kiba kum kine ki kam pynjot mariang. U Range Forest Officer ka Mairang Range u la ong ruh ba ka shlem kan ïai bteng ban pynlong ïa ki prokram pynshai paidbah halor kiba bun ki aiñ ïada mariang na ka bynta ki paidbah jong ka dong ka thaiñ.
