Shillong, Jylliew 21:
Ka Congress kaba don ha ka Liang Pyrshah ha ka Sngi Balang ka la pynpaw ba ka long kaba la kloi ban kyrshan bad ïatreilang bad ka sorkar Meghalaya Democratic Alliance (MDA-2) ba la lamkhmat da ka National People’s Party, tang lada weng noh ïa ka Bharatiya Janata Party (BJP).
U President ka Meghalaya Pradesh Congress Committee (MPCC), Bah Vincent H Pala haba kren sha ki lad pathai khubor u la ong ba ka Congress kan kmen shibun eh lada ka lah ban pynkohnguh ïa ka NPP ba kan dkhat noh ïa ka jingïadei bad ka BJP, haba la kylli ba hato ka Congress kan kyntu ïa ki nongïalam ka NPP ban phah mih noh ïa ka BJP na ka sorkar MDA.
Une u nongïalam ka Congress ha Jylla u la ong ba lada ka BJP kam don shuh ha ka sorkar MDA, kan long kaba kloi ban kyrshan bad ïatreilang bad ka NPP ha Jylla, kam don jingartatien satia ïa kane.
Kane ka jingkynthoh jong u ka la mih hadien ba ka Congress ka la kyrshan ïa ka NPP ban pynkhyllem ïa ka Executive Committee ba la ïalam da ka United Democratic Party (UDP) ha Khasi Hills Autonomous District Council (KHADC) lyngba ka No-Confidence Motion.
Halor ka jingleit ban ai jingkyrshan jong ki MDC ka Congress ïa ka NPP ha KHADC, u Bah Vincent u la ïathuh ba ïa kane ka kam, la leh hadien ba la dep ban ïoh jingmynjur ym kaba ki la shu leh lyndet.
Haba kylli, u la ong ba ha kaba ïadei pat bad ki 5 ngut ki MLA kiba la leit ban kyrshan ïa ka Sorkar ba la lamkhmat da ka NPP ha u snem 2022, ka dei kaba ki la leit hi da lade khlem ka jingtip jong ka seng, hynrei kane kaba mynta ka ïapher bha na kaei kaba la jia ha kito ki por.
Ha kajuh ka por, u Bah Pala u la ong ha KHADC ym don BJP satia. Katkum ka jingong jong u, u CEM u dei uba shah jied na ka NPP bad u Dy CEM un dei na ka Congress ha KHADC. “Namar kata, kano-kano ka rai ba kin shim kan long beit na ka bynta ka jingbha ka Council,” u la ong.
Haba phai pat sha ka Jylla, une u Khliehduh ka MPCC u la ong ba ka Congress kan ïai neh ban shong ha ka Liang Pyrshah bad kan ïai bteng ban kren ïa ki mat bapher bapher kiba ktah ïa ka Jylla bad ïa u paidbah.
U la ïeng skhem ruh ba lada dei ba don ka BJP ha KHADC, ka Congress kan nym treh satia ban ai jingkyrshan ïa ka NPP bad ong “Ngi la kren shai ba ngi kloi ban ïatreilang badno-badno ruh lait noh bad ka BJP”.
