Ngin ym pan jingkyrshan na kano-kano ka seng, ngin ïakhun hi marwei ïa ka ilekshon: VPP

Shillong Jylliew 21:

Ka Voice of the People Party (VPP) ha ka Sngi Balang ka la kren shai ba kan ym pan jingkyrshan na kano-kano ka seng saiñ pyrthei ban ïakhun ïa ka ilekshon ban wan sha ka Lok Sabha. 

“Em, ngin ïaid hi marwei. Ngin ym pan jingkyrshan na kano-kano ka seng saiñ pyrthei. Ngin ïakhun hi marwei ïa ka ilekshon,” la ong u Vice-President ka VPP, Dr. Kara Chen haba jubab la ka seng kan pan jingkyrshan ne em na kiwei pat ki seng saiñ pyrthei (kiba don kajuh ka jingmut) na bynta u kyrtong ka seng ha ka ilekshon MP ha u snem ban wan.

Haba pynshai ïa katei ka bynta, u la ong ba ka seng ka kwah ban shaniah hi halade khamtam ka jingshaniah ha ka jingkyrshan jong u paidbah bad kumta kam donkam ïa ka jingkyrshan jong kano-kano ka seng saiñ pyrthei.

“Kumba long ha ka ilekshon ba la dep, ngi la ïakhun hi marwei, ngim shym la ïatehlok bad kano-kano ka seng saiñ pyrthei bad na bynta ka ilekshon MP ruh, ngin ïakhun hi marwei khlem ka jingkyrshan jong kano-kano ka seng saiñ pyrthei,” la ong u Dr. Chen.

Halor ki mat kiba ka seng kan leit sha u paidbah, u la ong ba ki don bun tylli ki mat, hynrei kawei kaba ha khmat eh ka dei ka ‘Reservation Policy’, nalor kiwei-kiwei.

“Lada ki paidbah ki jied ïa u kyrtong jong ngi sha ka Lok Sabha, ngi sngew ba ngin lah ban pynpaw ïa ki jingsngew jong ngi hapoh ïingdorbar khamtam haba ïadei bad ka mat halor ka ILP bad kiwei-kiwei kiba donkam na bynta ka Jylla,” la ong u Vice-President.

Kumjuh, haba kylli la ka VPP kan pan jingkyrshan ne em na kiwei-kiwei ki seng ’riewlum na bynta kane ka ilekshon, u la ong ba ka seng kam sngew donkam ïa kata ka jingkyrshan namar ka nongrim jong ka seng ka ïapher bak-ly-bak na kiwei pat ki seng ’riewlum.

“Kumta kan long kaba eh ïa ngi ban ïatreilang bad kiwei pat ki seng saiñ pyrthei,” u la ong. 

Ka VPP ha ka Sngi Balang ka la pynbna ïa ka kyrteng jong u Dr. Ricky A.J. Syngkon kum u kyrtong ka seng u ban ïa aireng ha ka ilekshon sha ka Lok Sabha ha u snem ban wan.

Shuh shuh haba jubab u la bynrap, “Na bynta ka ilekshon MDC, ngi dang khmih bniah ïa ki kyrtong bad ngin sa pynbna hadien ïa kane.”