Shillong, Jylliew 21:
Ka Sorkar ka la bynshet ha ki bor pynïaid district ha ryngkat bad ki nongkitkam shnong ban buh jingkheiñ ïa kiba wan phet na Manipur sha kane ka Jylla.
Haba pynpaw ba ka Manipur ka mad jingeh kaba eh tam bad donkam ïa ka jingkyrshan jong baroh ki Jylla ka thaiñ Shatei Lam Mihngi ha kum kane ka por, u Myntri Rangbah Conrad K Sangma u la ong ba ka don ruh ka jingsngewkhia jong ki nongshong shnong ïa ka jingwan ki briew na kawei ka Jylla sha Meghalaya.
U la ong ba ka Sorkar ka la pyrkhat ïa kane, bad na ka liang ki bor pynïaid district bad ki bor shnong ruh naduh ki Rangbah Shnong ki la peitngor lang bad buh jingthoh ïa kiba wan.
Nalor kane, u la ong ki Rangbah Shnong bad ki bor district ki peitngor bad buh jingthoh ïa kiba wan namar ka don ka jingsngew ha ki katto katne ki jaka.
“Ka don ka jingsngewkhia namar ki don ki jaka ha kaba jingwan ki briew lehse ka kham bun, bad dei na kane ka daw ba ka don ka jingbthah ban peitngor,” la ong u Myntri Rangbah.
Kum ban shu kdew, ki don bun bha ki briew kiba la mih na Manipur namar ka jingumsnam kaba shyrkhei kaba la jia naduh ka 3 tarik Jymmang bad ka jingwan phai ka suk ka saiñ ha katei ka jylla ka dang i shim por.
