Shillong, Jylliew 21:
Ha kawei ka jingjia kaba sngewsih kaba la jia ha ka Sngi Balang ha ka por kumba 10:30 mynstep, kawei ka khynnah kynthei kaba dang 17 snem ka rta ka la dkhat noh ïa la ka jingim da kaba phasi ïalade ha u tyllai.
Katei ka jingjia ka la jia ha ka ‘Shelter Home’ jong ka tnad Social Welfare, Mawdiangdiang. Katkum ka jingïoh jingtip na u Superintendent of Police (SP) City, u Bah Vivek Syiem, u la ong ba katei ka khynnah ka la leh ïa katei ka kam da kaba sdien phasi ïalade ha kawei na ki kamra jong katei ka ‘Shelter Home’.
Utei u heh pulit u la ïathuh ruh ba katei ka khynnah ka dei ka lanot kaba la ngat teng ha ka jingshah leh be-i-jot. Kumta ïa katei ka jingjia la pynngat hapoh ka mukotduma POCSO kaba la ujor hapoh ka thanat Mawngap.
Na ka liang ki heh ophisar jong ka tnad Social Welfare haba ïoh jingtip halor katei ka jingjia ki la leit mar-mar sha katei ka ‘Shelter Home’ ban tohkit halor katei ka jingjia.
U Bah Syiem u la ïathuh ruh ba ka jingtohkit halor katei ka jingjia ka dang ïaid shakhmat bad ïa katei ka jingjia la pynngat hapoh Rynjah Police Station.
Ïa ka ‘Post Mortem’ la pyndep ha NEIGRIHMS, Shillong bad kat haduh ba la pynmih ïa kane ka khubor, ym pat tip satia ïa ka daw tynrai halor katei ka jingjia.
Katkum ki tyllong khubor ba la ïoh lum, la ïathuh ba katei ka khynnah ka dei kaba la mad ïa ka jingjia kaba sngewsih ha u Naiwieng jong u snem ba la dep ha kaba ka la shah leh be-i-jot ha la u jong u kñi. Kumta na ka bynta ka jingshngaiñ jong ka, ka Child Welfare Committee ka la shimti noh ïa ka bad pynbiang ïa ka jaka sah ha Shelter Home kaba ha Mawdiangdiang.
Na ka liang ka Meghalaya State Commission for Protection of Child Rights (SCPCR) ruh ka la shim khia halor katei ka jingjia.
