Shillong, Jylliew 21:
Ka Voice of the People Party (VPP) ha ka Sngi Balang ka la pynbna ïa ka kyrteng jong u Dr. Ricky A.J. Syngkon kum u kyrtong ka seng u ban ïa aireng ha ka ilekshon ban wan sha ka Lok Sabha.
“Ka State Election Committee (SEC) jong ka seng ka la ïakynduh ha ka 16 tarik mynta u bnai bad hadien ka jingpyrkhat sani bha, la mih kawei ka rai – ba ngin pynïeng ïa u Dr. Ricky A.J. Syngkon kum u kyrtong jong ka VPP na bynta ka ilekshon MP ka ban long ha u snem ban wan,” la ong u Vice-President uba long ruh u Chairman ka SEC, Dr. Kara Chen haba kren sha ki lad pathai khubor.
Halor kane, u la ong ba ka seng ka la ïoh pdiang ïa ki aplikeshon bad ki don ruh kiba la ïakynduh hi ïa u President ka VPP ban pynpaw ïa ka jingkwah jong ki ban ïakhun ïa ka ilekshon MP.
“Ki don 2 ngut kiba la aplai na bynta ban ïakhun ïa kane ka ilekshon na ka seng – Dr. Bahunlang Tron bad Prof. Lakhon Kma nalor u Dr. Ricky A.J. Syngkon. Ki don ruh kiwei kiba la wan ïakynduh hi ïa u President,” u la ong.
U Chairman u la ong ba u Dr. Syngkon ha kajuh ka por u dei ruh u General Secretary bad u dkhot nongseng jong ka VPP. Kumta ka seng ka sngew ba u long u briew uba biang eh ban mihkhmat ïa ka seng ha kane ka kynti.
Haba kylli, u la ong, “Kata ka jingsngew jong ngi, lada u ïeng na ka seng, u don jingkyrmen beit ban jop ïa ka ilekshon. Ka shong ym tang ha u kyrtong namar ka seng ruh ka don ka bynta kaba khraw.”
Haduh katno ka seng ka sngew skhem ban jop ïa kane ka ilekshon (MP), u Dr. Chen u la ong ba kum ka seng saiñ pyrthei, shisien ba la mih shakhmat ban ïa aireng ha ka ilekshon, kata hap ban ïaid shakhmat lada jop ne rem.
“Kam shong ha ka jingdon ki MLA, ka shong ha ka rai jong u paidbah bad kumta ngi sngew ba shisien ba ngi la mih ban ïakhun, ngi hap ban ïaid shakhmat bad ka shong ha ki paidbah ban rai la ngi jop ne rem,” u la ong.
Ha kawei ka liang, haba kylli halor ka jingpan tiket u Bah Mayborn Lyngdoh, utei u nongïalam u la bynrap, “Haba ïadei bad kata, na ka liang jong ngi, ngi khlem ïoh eiei namar don kito kiba la ïakynduh ïa u President bad don ruh napdeng jong ki kiba la ai da ki jingthoh ba ki kwah ban ïakhun ïa ka ilekshon MP.”
