Shillong, Jylliew 21:
U MLA ka North-Shillong, Bah Adelbert Nongrum ha ka Sngi Balang u la kyntu ïa ka Sorkar ba kan weng noh mardor ïa ka jingpynlip bording kaba naduh ka por 12 baje mynmiet haduh 6 baje mynstep namar ka la ktah shi kat dei ïa ka imlang-sahlang. “Da ka jingsngewkhia halor ka jingbym shngaiñ ha ka ïaid ka ïeng ha surok, lynti-syngkien ne ha la ïing, ka jingshim kabu jong ki ‘riew kwah suk ka ïalam sha ka jingtuh jinglute, ka jingkyndang dukan, bad kali kaba jia man ka sngi. Hato ka Sorkar ka don khmat ban peit ne shkor ban sngap ne ka jingstad ban shim ïa ka rai ha ka por kaba biang tam,” la buh jingkylli u Bah Nongrum.
U la pynpaw ruh ka jingsngewkhia namar ka jingpynlip bording khamtam ha ka por 12 baje mynmiet haduh 6 baje mynstep ka pynlong ïa ki ‘riewshim kabu ba kin nud ban pynshongsyier ïa ka imlang-sahlang.
“Nga kyntu…ym ban kyrpad ne ban shu ai jingmut ïa ka Sorkar – ka dei ban don ruh ka jingkitkhlieh ba ka dei ban weng noh mardor ïa ka jingpynlip bording kaba ju pynlip naduh ka por 12 baje mynmiet haduh 6 baje mynstep namar ka la ktah palat ïa ka imlang ka sahlang ha kylleng bad kaba la wanrah ka jingshongsyier bad pynshitom ruh ïa kito ki longïing kiba don ïa kiba pang ba shitom ne kiba mad ïa ki jingjia ba sngewsih,” u la ong.
Shuh shuh u la bynrap ba ka Sorkar ka dei ban pyllait noh mardor ïa ka jingpynlip bording ha katei ka por.
“Nga ngeit ba ka jingdon u slap ka la dei ban nang ai ka jingïarap ban lait noh na ka jingpynlip bording ilektrik kaba la neh la bun bnai,” u la ong.
