Shillong, Jylliew 21:
U President ka Meghalaya Pradesh Congress Committee (MPCC) Bah Vincent H Pala u la ong ba ka Congress kam shym la don bynta eiei ruh em na ka jingshah pynkhyllem ka Executive Committee ba la lamkhmat da ka United Democratic Party (UDP) ha Khasi Hills Autonomous District Council (KHADC).
Kat kum ka jingpynpaw jong u Bah Vincent, ka EC ka la khyllem namar ka jingïakhun hapdeng ka National People’s Party (NPP) bad ka United Democratic Party (UDP).
Haba kren sha ki lad pathai khubor ha ka Sngi Balang, u Bah Pala uba dei ruh u MP ka Shillong u la ong, “Ngim don bynta ha ka jingpynkhyllem ïa ka EC ba ïalam da ka UDP ha KHADC. Da kaba kren hok, ka dei ka jingïakhun hapdeng ka NPP bad ka UDP.”
“Haba ka NPP ka khot ïa u Bah PN Syiem, u la ïathuh ïa nga bad ngi la ïakren sani bha bad la ïakren ruh bad ki nongïalam ba halor ka Congress shwa ba ngin shim ïa ka rai,” la ong u Bah Pala.
U Bah Pala u la ong ba ïa kane ka rai la shim ban pynthikna ba ka seng kan ïoh buh hakhmat ïa ki jingai jingmut ha ka jingtyrwa ban pynkylla thymmai ïa ki kyndon ka Sixth Schedule jong ka Riti Synshar ka Ri.
“Da kaba ïoh rung hapoh ka Council, ngin lah ban shim rai ba ha kano ka rukom yn pynkylla ïa ka Sixth Schedule bad kumno ba ngin lah ban ïada ïa ki briew jong ngi. Ngim ïoh eiei na ka jingïasoh, hynrei ngi ïoh pat ban buh hakhmat ïa ki jingai jingmut ha ka jingpynkylla ïa ka Sixth Schedule,” u la ong.
Ha kawei pat ka liang, u Bah Pala u la kynnoh ba ka BJP ka la pyrshang ban pyntroiñ ïa ka Sixth Schedule bad ong “Namar ka jaka tynrai jong ki paid Khasi Jaiñtia bad Garo khamtam ha ki jaka lum, baroh ki 11 tylli ki District Council kin hap hapoh ka Sixth Schedule. Namar kata, ka BJP ka la pyrshang ban pyntroiñ ïa ka Sixth Schedule. Ki la wanrah ïa ka Bill ha u 2019 ha Rajya Sabha bad ka Committee of Home Affairs ka la dep phah ïa ki jingai jingmut ha ka 5 tarik Lber, 2020 sha ka Sorkar bad mynta ka Sorkar ka don jingthmu ban wanrah noh ïa ka Bill”.
U Bah Pala u la ong ba ka Sorkar Pdeng ka donkam ïa ki Resolution na ki Council bad ki Jylla shuwa ban wanrah ïa ka jingpynkylla haba bynrap “namar kata, hapoh 5-6 bnai, ngin lah ban shim ïa ka rai khamtam ïa ka ilekshon u Rangbah Shnong, ïa ka hok u paidbah ha ka riti bat khyndew ka long kaba kongsan ïa ngi ban ïada bad kyntiew ïa la ki jong ki briew”.
