Shillong, Jylliew:
Ka kynhun jong ki nongrep ka jylla kiba don hapoh ka lama jong ka Hill Farmer’s Union (HFU) ka la leit ban ai da ka shithi sha u Myntri ka tnad ri jingri ka sorkad jylla, u Bah A.L Hek halor ka jingkyrpad ban ïarap ha kaba ïaei bad ki jingeh bapher bapher kiba ki nongrep ki ïakynduh.
Haba kren sha ki lad pathai khubor ha ka sngi ba ar hadien ka jingïakynduh ïa u Myntri ka sorkar jylla, na ka liang u President ka HFU, u Bah Commander Shangpliang u la ong ba ka jingwan jong ka kynhun ban ïakynduh ïa utei u Myntri ka long halor ka jingïap jong ki jingri.
U Bah Commander u la ong ba ka kynhun ka la kyrpad ruh ïa ka sorkar ban ïarap mar shiteng ka jingduhnong ïa ki nongrep kiba la duhnong na ka daw jong ka jingïap noh jong ki sniang, ki masi bad ki syiar namar ka jingpang khlam kaba la ktah ïa ki. Katba na ka liang utei u Myntri u la ong ba kam don kano kano ka jingsynñiang kaba la mang lypa na ka bynta ban ai jingïarap ïa ki jingri lait noh sa tang lada ka jingïap jong ki jingri ka long na ka daw ka jingshah lynshop ha ka bor mariang.
“Ngi la ban jur ïa i halor kane ka jingïarap hynrei na ka liang jong u Myntri, u la ong ba un sa ïakren ïa kane bad u Myntri Rangbah ka jylla ban peit na kano ka jingsynniang ne kano ka bynta yn lah ban ïarap”, la ong u Bah Commander.
U Bah Commander u la ong ba ka kynhun ka la kyrpad na utei u Myntri ban ïarap ïa ki nongrep bad kumjuh ki kynhun nongrep kiba shim da ka ram na ki bank kiba la shah ktah na ka jingsar jong ka khlam kaba la buh jingeh ïa ki ban siew dep ïa ka ram.
Katei ka kynhun ka la dawa ruh na utei u Myntri ba ka tnad ka dei ban pynbiang ïa ki doktor bad ki nongtrei ha ka tnad Veterinary namar ka jingduna palat ki nongtrei ha ki ophis treikam ka la pyntlot bor ban ai jingshakri sha ki nongri jingri bad ka kynhun ka la dawa ruh ba ka tnad ka dei ban pynbiang ïa ki dawai na ka bynta ki jingri lyngba ki jaka ai jingsumar, ki Dispensary jong ka tnad Veterinary ha man la ki jaka ba don kine ki jaka ai jingsumar.
Shuh shuh u Bah Commander u la ïathuh ba na ka liang u Myntri u la pyntip sha ka kynhun ba ka tnad kan sa pyllait paidbah shen ïa kawei ka projek na ka bynta ban wanrah ïa ki Mobile Dispensary bad ka Call Centre kaba lah ban long lehse, lyngba ki kali ha kaba lada don kino kino ki jingpang kiba jia ïa ki jingri jingdup, ki doktor ki lah ban leit ban leit da ki kali ban khmih bad leit ai dawai ïa kitei ki jingri.
Katei ka kynhun ka la dawa ruh ba ka sorkar ka dei ban pynheh ïa ka mang tyngka jong ka Veterinary khnang ba yn lah ban ïarap ïa nongri jingri, ban mang pisa kyrpang ban ai jingïarao kaba kyrkieh ïa ki nongri jingri kiba la duhnong na ka jingshah ktah ha ka khlam bad ka la kynhun ka la dawa ruh ba ka sorkar ka dei ban khang shipor ïa ka jingwan rah ïa ki sniang, ki syiar, ki masi na shabar ka jylla khnang ban ïada na ka jingpang kaba lah bab pynsaphriang lane ïabit bad ki jingri kiba na ka jylla.
