Shillong, Jylliew 22:
Ka jingther u slap ha kine ki artaïew duna ha nongbah Shillong bad khapsor ka la pynlong ïa ka Umïam ban kiew haduh 21 phut.
Ha ka jinghiar jurip u nongthoh khubor na Shillong ha ka 22 tarik mynta u bnai la lap ba ka Umïam ka la sdang jyrngam biang namar lada peit na jaka jngoh (view point) na Ryndang Briew ym shym la ïohi shuh ïa ka surok rim kaba la paw ha kine ki sngi na ka jingrang tyrkhong ka suiñbneng.
Kum ban shu pynkynmaw, u nonglum khubor u la wan shondur khatduh ïa ka pung Umïam dei ha ka 9 tarik mynta u bnai mynba ka um ka dang poi tang 3164.95 phut. Hynrei, hadien 13 sngi ba wan hap u slap ka um ka la kiew shaduh 3186.33 phut, kaba mut ka um ka la kiew haduh 21.38 phut.
Kumba ki paidbah ki ap khmih lynti ïa u slap haduh ka taïew ba nyngkong jong u ’nai Jylliew namar ka jingtyrkhong ka mariang bad mynta haba u slap u la hap ka tnat MeECL kan sa pynduh noh ïa ka jingpynlip bording hapoh ka jylla namar ka Umïam ka la sdang ban kiew.
Ka jinghap u slap ha kine ki artaiew duna ka la wanrah ruh ka jingshlei um ha ka thaiñ Pynthorumkhrah bad twa ki kynroh.
