Shillong, Jylliew 22:
Ki bor pynïaid district jong ka East Khasi Hills ha ka sngi palei ki la bthah noh ïa baroh ki briew kiba sah ha ka ïing jong u Dr. M.L Deb kaba don hajan ka Hotel Heiga, Lachumiere ba kin kynriah noh namar ka jingshong synjor na ka jingtwa khyndew.
Kane ka jingbthah ki bor district ka la long hadien ba la lap ba kane ka ïing mynta ka don hapdeng ka jingma na ka jingkhyllem ne twa namar ka jingshong synjor ka khyndew. Kane ka long ruh hadien ba ka la don ka jingtwa ha ka miet sngi Balang, namar ka jinghap jong u slap. La sakhi ba na ka jinghap jong u slap, ka la pynshong synjor ïa ka khyndew, ha kaba ka la wanrah ka jingtwa ba kynsan jong ka kynroh maw ba la kynroh haba pynïeng ïa kane ka ïing.
Kane ka kynroh kaba twa ka dei kaba don marjan bad ka Hotel Heiga. Baroh ki maw bad khyndew ki la tuid lut sha ka surok bah hapdeng ka Malki bad Dhankheti.
Ki kali puh shilum ki la bunkam baroh shi miet ban khat ïa ka khyndew bad ïa ki maw khnang ba ki kali kin ïoh ïaid biang na kane ka surok bah.
Kumta ki bor pynïaid district namar ka jingsakhi ba katei ka ïing ka la sdang shong synjor bad buh jingma, ki la bthah ïa ar ngut ki briew kiba shong ba sah ha kane ka ïing ba kin mih noh ha ka miet jong ka sngi Balang ban lait na kano-kano ka jingma bad jingmynsaw.
