Shillong, Jylliew 22:
Ka Seng Kynthei Mawkhar Welfare Organisation ha ryngkat ka jingïatreilang bad ka Netralaya Mission Eye Care mynta ka sngi Palei ka la pynlong ïa ka “Free Eye Check-Up” ha Community Hall, Mawkhar naduh ka por 11 baje mynstep haduh 4 baje janmiet.
Haba kren sha ki lad pathai khubor, ka General Secretary ka seng, ka Kong H. Dolly Lymba ka la ong ba ka seng kynthei jong ka Mawkhar ka ju pynlong ïa katei ka jingai jingsumar khmat ei ha ki snem kiba la leit noh hynrei namar ka jingwan lynshop jong ka khlam Covid-19, ka seng ka khlem shym lah ban pynlong ïa katei ka prokram.
“Ngi pynpaw ïa ka jingsngewnguh ïa ka Dorbar Shnong Mawkhar kaba la shah ïa ngi sa shisien pat ban pynlong ïa kane ka Free Eye Check-Up prokram ha ryngkat ka jingïatreilang bad ka Netralaya Mission Eye-Care”, la ong ka Kong Lymba.
Ka Kong Lymba ka la ïathuh ba haduh ka por 3 baje janmiet, ki nongwan shim dawai khmat ki la don haduh 51 ngut.
Shuh shuh ka Kong Lymba ka la ong kaba la pynlong ïa ka seng ban pynlong da katei ka prokram ka dei namar ba la ïohi ba kiba bun ki briew kim shym la lah satia ban leit shim ïa ka dawai khmat na ki doktor wat lada ki la shitom eh.
“Kane ka jingsumar ïa ki khmat ka pynlong ïa ngi ka seng kynthei ban pynlong ïa kane ka prokram namar ngi ïohi ba kiba bun kim shym la lah wat lada ki la shitom ki khmat ruh kim shym la lah ban leit sha ki jaka sumar hynrei da kaba ki wan hangne ki la ïoh ka jingkyrkhu kaba khraw”, la ong ka Kong Lymba.
Ka Kong Lymba ka la ong ba ki briew kiba wan phah peit ïa ki khmat jong ki ha katei ka sngi kim donkam ban siew pisa bad ïa ki ïitkhmat bad ki dawai ka don ka ‘discount’ lane ka jingsiew kaba mar shiteng dor.
Ka Kong Lymba ka la ong ba katei ka prokram ka la long ka jingkyrkhu ïa ki paidbah kiba wan baroh bad nalor kane ka jingsumar khmat ei, ki la don ruh ki nongwad bniah kiba dei ki khynnah jong ka dong Mawkhar ha ka liang ka jingthew ïa ka snam, kiba pang shini bad ïa kiwei kiwei ki jingdonkam ha ka met.
Ka la ong ba lada kiwei ki kynhun ki lah ban pynlong ïa kum kine ki prokram, kan long ka jingkyrkhu shibun ïa kito ki briew ki bym shym lah ban kot bor ban leit phah sumar ïa ki khmat jong ki sha ki jaka sumar.
