Shillong, Jylliew 22:
Wat la u Myntri ka tnat Social Welfare, Bah Paul Lyngdoh, u la dep pynbna lyngba ha ki lad pathai khubor ba ka sorkar ka la dep ban weng ïa ka Kong Phidalia Toi kum ka Chairperson jong ka Meghalaya State Commission for Women (MSCW), hynrei katkum ki jingthoh bad ki kot ki sla ba la ai da ka MSCW sha ki lad pathai khubor, la paw ba ka Kong Toi ka dang dei hi ka Chairperson jong kane ka Commission.
Ha ka Sngi Thohdieng, ka MSCW ka la pyntip ba kan pynlong da ka jingïalang (Seminar) ban ïakren halor ki mat kiba ïadei bad ki longkmie kiba hap ri khun rei bad ka phang jong kane ka jingïalang ka dei “Seminar on Socio – Economic Status of Single Mothers”. Ïa kane ka jingïalang la ai jingkyrshan da ka National Commission for Women, New Delhi, bad yn pynlong ha State Convention Centre, Shillong.
Haba la peit bniah ïa ka pali ba la pynbeit na ka bynta ki nongkren ha katei ka jingïalang, la shem ba ka kyrteng jong ka Kong Phidalia Toi ka dang paw bad la thoh ba ka dei ka Chairperson jong ka Meghalaya State Commission for Women. La thoh shai ba ïa ki kyntien pdiang lane kata ka ‘Welcome Address’ yn ai da ka Kong Phidalia kum ka Chairperson ka MSCW.
Dang ha ka 15 tarik Jylliew, u Bah Paul u la pyntip ba ka sorkar jylla kan sa thung noh mynta ïa ka briew ka bym don jingïadei ha ki kam saiñ pyrthei kum ka Chairperson bathymmai ka MSCW. U la ïathuh ba ka tnat Social Welfare kan sa thaw ïa ka Search Committee ban wad ïa kane ka Chairperson bathymmai.
Kham ha shwa jong kane, kata, ha ka 7 tarik Jylliew, u Bah Paul u la ïathuh ba ka sorkar kam pat lah ban thung thymmai ïa ka Chairperson ka MSCW hadien ka jingbym pynneh ïa ka Kong Phidalia Toi.
U Bah Paul u la pynkynmaw ba ka Chairperson barim ka Kong Phidalia ym dei tang namarba ka don bynta lang ha ki rynsan ïalap ilekshon ha ki bnai ba la dep, hynrei katkum ki kyndon aiñ ka dei ban ïadon bynta ha ki lai tylli ki jingïalang jong ka Board.
Na ka liang U Bah Paul u la pyntip ruh ba haduh mynta ka sorkar ka khlem pat thung bujli da kano kano ka Chairperson ha ka jaka jong ka Kong Phidalia bad ka sorkar ka hap ban peit bniah bha ïa ki briew ha shwa ban jied ban long kum ki Chairperson namar hadien ka jingjia kaba la dep, na ka liang ka sorkar ka hap ban peit ïa ki briew kiba don shisha ka mynsiem bad ka jingmut ban trei ïa ka kam.
Ha kaba ïadei bad kiwei pat ki dkhot jong ka Commission na ka liang u Myntri sorkar u la pyntip ba kiba rim kin bteng hi ïa ka kam haduh ba kut ka samoi treikam jong ki hynrei ban pynthymmai dei tang ïa ka Chairperson kaba hap ruh ban ïakren bad u Myntri Rangbah.
Lah ban pynkynmaw ba na ka liang ka MSCW ka la pynmih da ka jingthoh hadien ba ki dkhot ka MSCW ki la ïoh jingtip lyngba ki lad pathai khubor, ha kaba u Myntri sorkar, u Bah Paul Lyngdoh, u la pynbna da kaba ong ba la weng noh ïa ka Chairperson jong ka Commission.
Ha u kyrwoh khubor ba la phah ha ka 14 tarik Jylliew, ka MSCW, ka la ong ba ka jingkren jong u Bah Paul ka long kaba ïaid pyrshah ïa ka kyndon aiñ jong ka The Meghalaya State Commission for Women Act 2005, ha kaba la batai ba ha ka Chapter II, Section 4 (3), yn ym lah mano mano ban shah weng kam tat haduh da la ïoh ïa ka lad jingpynshai kaba tikna..
Ka MSCW ka la ong ruh ba ka jingkynnoh ba ka Kong Phidalia ka la pep ha ki 3 lane 4 tylli ki jingïalang ka long kaba bakla namar ïa kita ki jingïalang la khlieh hi da ka Chairperson.
