Tura, Jylliew 22:
Ki nongshong shnong kiba sah sha shiliang ka Wah Simsang ha South Garo Hills ki la kyntu ïa ki bor pynïaid distrik ba kin maramot noh mar-mar ïa ka jingkieng ïaid kjat ha Rewak ban suk ka ïaid ka ïeng.
Katkum ka jingïathuh jong ki nongshong shnong, dei tang katei ka jingkieng ha Rewak kaba ïarap ïa ki ban ïaid na shiliang sha shiliang ka Wah Simsang. Hynrei kane ka jingkieng ka la julor hadien ba wan u ‘lap bah ‘lap san ha u snem ba la dep.
Da ka jingbymdon shuh katei ka jingkieng, ki nongshong shnong ba kynthup ruh ïa ki khynnah skul ki la hap ban shong noh da ki lieng hapdeng ka jingheh bad jingitriem jong ka Wah Simsang. Wat la ka jingpyndonkam da ki lieng kam long kaba shngaiñ khamtam ha kum kane ka aïom ba jur slap, hynrei ki nongshong shnong kim don lad da kumwei pat.
Shuh shuh ki nongshong shnong ki la ïathuh ba wat u Myntri Rangbah, Conrad K Sangma, ha ka por ba u la wan jngoh ïa katei ka thaiñ, u la kular ban phah maramot noh ïa katei ka jingkieng. Hynrei haduh mynta, kam pat don eiei satia kaba kum kata.
“Ngi sngew sheptieng na ka bynta ki khun ki kti ha kane ka por ba jur slap namar kim don lad da kumwei pat ban poi sha ki skul lait noh da kaba shong da ki lieng. Namarkata, ngi kyntu ïa ki bor distrik ban maramot ïa ka jingkieng Rewak kham kloi katba lah,” la kyntu ki nongshong shnong.
