Shillong, Jylliew 22:
Ka President ka Ri, ka Droupadi Murmu, ka la pynkup burom ïa ka Kong Reliance Pyrngap da ka khusnam National Florence Nightingale Award ha ka jingïalang kaba la long ha Rashtrapati Bhavan ha ka Sngi Palei.
Ka Kong Reliance Pyrngap kaba dei na Meghalaya, ka la ïoh pdiang ïa katei ka khusnam na ka bynta u snem 2022 kum ka dak jong ka jingithuh ïa ka jingshakri kum ka Auxiliary Nursing Midwifery (ANM) bad Lady Health Visitor (LHV) mynta la palat 35 snem. Ryngkat bad ka Kong Pyrngap, ka President ka la ai ïa kitei ki khusnam sha kiwei pat ki nos bad nongtrei ka koit ka khiah na kylleng ka Ri.
Katkum u kyrwoh khubor na ka PIB, la ong ba ka Kong Pyrngap ka la trei ha ka Primary Health Centre kaba don ha Saipung bad mynta, ka trei ha ka Community Health Centre Sutnga ha East Jaiñtia Hills.
Haba kren bad ka PIB Shillong, ka Kong Pyrngap ka la pynpaw ïa ka jingsngewkmen haba ka la ïoh ïa katei ka khusnam. “Nga sngewkmen shikatdei ba nga la ïoh ïa ka jingithuh na ka bynta ka jingtrei shitom ka jong nga. Nga ju pyrshang ban trei 100 na ka 100 ïa ka kam naduh kaba sdang jong u snem bad haduh kaba kut. Wat la ngam lah ban aiti 100 na ka 100, hynrei nga trei shitom katba nga lah bad namarkata, nga sngew ba ka dei kane ka daw ba nga la ïoh ïa ka khusnam.”
“Nga kwah ban ong sha ki para ba ïatreilang ba kin ai ïa kaba bha tam khnang ba ma ki ruh kin ïoh ïa ka jingithuh na ka bynta ka kam ba kongsan ba ki trei ha ka imlang-sahlang,” la bynrap ka Kong Pyrngap.
Ka Myntri ka tnat ka koit ka khiah ka sorkar jylla, ka Kong Ampareen Lyngdoh, ka la ai khublei ïa ka Kong Pyrngap halor ka jingïoh ïa katei ka khusnam bakongsan.
“Nga pynpaw ïa ka jingsngewnguh bad nga ai khublei ïa ka Kong Reliance Pyrngap, Lady Health Visitor na Sutnga CHC, East Jaiñtia Hills, halor ka jingïoh ïa ka khusnam National Florence Nightingale Award. Kane ka khusnam ka pyni ïa ka jingnoh synñiang ka jong i kum i nos bad ka long ka dak jong ka jingtrei shitom ban shakri ïa ki para briew,” la ong ka Kong Ampareen.
Ïa ka khusnam National Florence Nightingale Award la buh la seng da ka Ministry of Health and Family Welfare, Sorkar India ha u snem 1973 kum ka dak ban ai jingithuh ïa ki nos na ka bynta u synñiang ba ki noh sha ka imlang-sahlang.
