Shillong, Jylliew:
U MDC ka NPP na Rambrai-Jyrngam, Bah Bajop Pyngrope, u la ong ba u Bah Titosstarwell Chyne uba dei CEM barim ka KHADC u la byrthen ban wanrah ka jingkylla ha ka sorkar lada jop u kyrtong ka UDP ha Sohïong konstitwensi. Hynrei um poi pyrkhat ba kane ka jingkren kan kyrtoh kylla sha KHADC kat haduh ba un shah pynhiar ïalade kum u CEM.
U Bah Bajop u la ong ha ka por ilekshon u la pynpaw ba ka NPP kan weng ïa ka UDP na ka sorkar hadien ka ilekshon. Kane kam mut ba un kren ha KHADC namar ka long tang ban ai mynsiem ïa ki nongkyrshan ka NPP ha Sohïong konstitwensi, hynrei um poi pyrkhat ba tang katto katne bnai la shah weng ka UDP na ka Executive Committee.
Nangta, u la ong ba ka jingwanrah ïa ka No-Confidence Motion halor ka jingbym shaniah shuh ïa u Bah Titos ka dei namar u leh marwei bad um ju pyntip ïa ki para dkhot, bad kane ka la pynsngewsih.
Nalor kane, u la ong ba lada kane ka EC kaba mynta ka leh marwei u hap ban pyrkhat thymmai namar ki wan hangne na ka bynta ka jingmyntoi jong ka jaidbynriew.
Shuh shuh u la ong ba kum u MDC um kwah ban long EM, hynrei ka shong beit ha ka jingpynïaid u CEM.Nalor kata, u la ong ba wat la ki MDC ka NPP ki ïatreilang bad ka Congress ha KHADC, hynrei ha ka Sorkar Jylla um don jingtip eiei, la ka UDP kan shah weng ne kan dang ïatreilang.
