Shillong, Jylliew 22:
Ka jingtwa ka kynroh jong ka PA Sangma Sports Complex ha Tura ka la pynkyndit ïa ki nong Tura ha ka step Sngi Palei bad buh jingma ruh ïa ki ïing bad ki briew kiba sah ha syndah kane ka stadium ha kaba ka Sorkar Jylla ka la dep khap ribon ha u Nohprah, 2022 kum ka jingplie teng ïa ka bynta kaba dei ka madan phutbol, katba ka jingtei ïa ki indoor hall ka dang ïaid bad yn pyndep ha u Nohprah 2024.
Kane ka jingtwa ka kynroh jong ka madan phutbol ka la pynjulor katto katne ki kali kiba don ha syndah ka stadium khamtam ki kali kiba ïeng hajan ka kynroh. Ha kane ka jingjia ym don kano kano kaba wanrah jingduh ïa ka jingim briew.
Wat la ka jingtohkit ka dang ïaid ban lap ïa ka daw ba tikna, hynrei ka Sorkar ha u kyrwoh ba pyllait da ka tnat Sports lyngba u Commissioner & Secretary, u Dr. Vijay Kumar D, la ai daw ba ka jingjur slap kadei kawei na ki daw, namar ka sor Tura bad ka West Garo Hills district baroh kawei ka la mad ïa ka jingjur slap ha kine ki sngi.
Baroh ki bynta ba don ka jingtwa la pynkhuid ïa ka khyndew ba twa, bad ki kam ban maramot kin ïaid noh kloi.
Ka madan phutbol ka dei lang shibynta jong ka PA Sangma Sports Complex, bad ïa kane ka jingtei la aiti ha ka Hindustan Steelworks Construction Limited, ka kompani ba don bad ka Ministry of Housing & Urban Affairs ka Sorkar Pdeng.
Ki don sa ar tylli ki indoor hall kiba dang tei shuh ha ka jingheh kaba 10,544 sq.m, bad ka indoor hall kaba nyngkong, ka don ka jaka ban jngi, ïalehkai squash, bad gymnasium.
Ka hall kaba ar ka don bun ki bynta kum ka jaka ïalehkai badminton, table tennis, bad basketball.
Kane ka projek ka dei kaba la mang kumba T. 127.7 klur, bad ka jingpynwandur la leh da ki kompani ba la paw ha ka ri da kaba pynrung lang ïa ka jingdonkam ban pynbiang ïa ka madan ban lah pynlong ïa ki jingïalehkai kiba heh ha ka ri bad bar ri.
Ka Sorkar ka la ong ba baroh ki jingdro kiba dei bad kane ka complex, kynthup ka kynroh, la dep mynjur da ki briew kiba dei na ki jaka pule ba paw.
Haba pyntip ba yn tohkit bniah ïa kane ka jingtwa, bad la nang leh ruh ïa kawei ka jingtohkit da u Deputy Commissioner ka West Garo Hills, ka Sorkar ka la ong ba ka kynhun ki karikor na ka State Sports Council, Shillong ki la don ha katei ka jaka ha ryngkat ki kontraktor ba pyntrei.
Shuh shuh la ong ba ka tnat Sports kan ïatreilang bad baroh ki nongdonbynta ban pyntikna ba ka jingtei ïa kane ka projek kan dep ha ka por ba la buh bad ba ki samla ka sor Tura kin ïoh ban pyndonkam ïa kane ka jaka ïalehkai.
