Shillong, Jylliew 22:
Ki Executive Member (EM) kiba dei ki dkhot ka Executive Committee kaba thymmai ha Khasi Hills Autonomous District Council (KHADC) kin sa tip ïa ki tnat treikam kiba la bate bad bynshet ha ki da u Chief Executive Member (CEM), u Bah Pynïaid Sing Syiem, hynrei la antad ba ka tnat pla tyngka yn sa peit hi da u CEM.
Ïa ka tnat pla tyngka la antad ba u Bah Pynïaid un bat hi namar ha ki snem kiba la leit, ha ka por ba u long kum u EM, u la bat teng ïa ka tnat pla tyngka.
Haba kylli ban ïoh jingtip na ki tyllong khubor, mano napdeng ki EM kiba ïoh ïa ki tnat treikam kiba kumno, ym don ba ïathuh, hynrei la ong ba ka thup kyrteng jong ki EM ha ryngkat ki tnat treikam ba la bynshet ha ki, kan sa mih ha ka sngi Thohdieng.
“Ym lah ban tip ngin ïoh da ka tnat treikam kaba kumno, namar kane ka dei ka bynta jong u CEM ban bate ïa ki tnat treikam,” la ong uwei na ki EM, haba kylli.
La antad ruh ba ki EM kiba la don ha ka Executive Committee kaba rim, ki lah ban ïoh biang ïa kijuh ki tnat treikam kiba ki la ïoh ban peit baroh shikatta. Hynrei kin don ruh katto katne ki jingkylla ha ka jingbate u CEM ïa ki tnat treikam namar ki EM mynta, ki dei lang ruh na ka Congress.
Ka Executive Committee kaba thymmai ha KHADC la thaw da ka jingïatreilang ki MDC na ka NPP bad ka Congress hadien ba khyllem noh ka Executive Committee kaba ïalam da u CEM barim, u Bah Titosstarwell Chyne.
U Bah Titos uba dei na ka UDP, mynta u la kylla long u nongïalam ka Liang Pyrshah ha KHADC hadien ba ka NPP kam ïatreilang shuh bad ka UDP.
