Shillong, Jylliew 22:
U Bah Mayborn Lyngdoh u la rai ba un ïakren shwa ha ïing halor ka ilekshon MP sha Lok Sabha shwa ba un rai nangne shakhmat hadien ba um shym ïoh tiket na ka seng Voice of the People Party (VPP).
Kane ka jingkwah ban ïakren janai bad ki bahaïing ka dei namar ba ka VPP ka la pynbna ban ai tiket ïa u Dr. Ricky A.J Syngkon uba dei u General Secretary ka VPP mynha ka 21 tarik mynta u bnai ba un long kum u kyrtong ha ka ilekshon MP Lok Sabha.
Haba ïakren bad u Bah Mayborn u la ong naduh ba u ïakhun ïa ka ilekshon MLA na ka seng VPP na Pynthorumkhrah konstitwensi ha kane ka ilekshon ba dang shu dep u la ïasyllok bad ki kmie ki kpa kumjuh bad ki bahaïing hasem bad mynta ruh un leh biang kumjuh.
Nangta, u la ong naduh basdang ba u rung sha ka saiñ pyrthei u kwah ban ïakhun ïa ka ilekshon MP bad mynta haba um ïoh tiket na ka VPP u hap ban shong pyrkhat bad ki bahaïing.
Halor ka jingpynsaphriang ki khubor ha kine ki sngi, u Bah Mayborn u la ong ba kiei-kiei kiba jia kum u briew u hap mad ki jingshah kynthoh ki jingshah kynnoh, hynrei un nym kynran dien ban shakri kam paidbah.
Nalor kata, u la ïathuh ba haduh mynta u dang dei hi u dkhot ka VPP.
