Shillong, Jylliew 22:
Hadien katto katne sngi ba la kynnoh ba ka don ka jingkhleh dawai ‘Formalin’ ha ki dohkha bad kumjuh ïa ka jinglap ïa ka jingpang Lumpy Skin Disease ha ki masi, mynta ka la don sa ka jingpynsaphriang ïa ki khubor ha ki rynsan ‘Social Media’ lyngba ka Whatsapp kaba la pyntieng ïa ki paidbah ba wat ki syiar ruh ki la don ïa ka jingpang.
Halor kane ka jingsaphriang jong katei ka khubor, na ka liang ka seng jong ki nongdie dohsyiar ha Ïewduh kaba la tip kum ka All Meghalaya Poultry Suppliers and Retailers Association, ha ka sngi Palei ka la pynshai paidbah halor kane ka khubor ba kam dei satia kaba shisha hynrei ka dei tang ka jingshna jong ki ’riew shim kabu ban ïalam bakla bad pyntieng ïa ki paidbah.
Ki ’riew shim kabu kiba la pynsaphriang ïa katei ka khubor ki la shna ïa ki dur ki dar ba ki syiar ki don jingpang bad ka jingbuh jingma ïa ki paidbah lada ki bam ïa ka dohsyiar bad ka pylleng kaba pynsaphriang lyngba ka Whatsapp.
Haba kren sha ki lad pathai khubor, u President ka seng u Bah Wanshailang Kharshandy, u la ong ba hadien ba ka seng ka la ïoh jingtip halor kane ka khubor ka la pynlong ïa ka seng ba kan nym shong kli kti. Kumta kum ka seng ka la leit ban ïakynduh ïa ki doktor ka tnad ri jingri ban ïakren halor kane. Na ka liang ki doktor ki la ong ba kim shem la ïoh jingtip eiei ba kan don kano kano jingpang ha ki syiar.
“Hadien ba ngi lah ïashong jingïalang bad ki doktor bad ki Director jong ka Veterinary Department, ka la mih kawei ka rai kaba na ka liang jong ki ruh, kim pat shym la ïoh jingtip ba kin don kum kane ka jingpang hangne hapoh ka jylla ka jong ngi”, la ong u Bah Kharshandy.
Namar kata, katei ka kynhun ka la kyntu ruh ïa ki paidbah ba kim dei ban tieng bad ban don ka jingsyier ban bam ïa ka dohsyiar namar ka doh kaba ki die bad ot ka long ka doh kaba bha bad kaba khuid ban bam. Kum ka seng ruh ka la shim ïa ka jingkitkhlieh ba kano kano ka mar kaba sniew bad kaba pang ym dei ban wanrah hapoh ïew.
Shuh shuh u Bah Wanshailang u la ong ba halor kane ka jingjia shah pynsaphriang ha ki briew ba shim kabu, na ka liang ka tnad pulit jong ka Lumdiengjri, ka la ai ka jingïateilang bad ki nongdie dohsyiar lada don biang kum kine ki jingjia nangne shakhmat.
Na ka liang ka seng ki nongdie dohsyiar ka la kyrpad ruh ïa ki nongshim kabu ba kin ym bit ban pyntieng pynsmiej ïa ki paidbah bad ka seng ka la dawa ruh ba ka aiñ ka dei ban pynshitom ïa kitei ki briew kiba la shim kabu ban pynsaphriang ïa katei ka khubor lamler.
