Rai ka BAM ban khang shwa shipor ïa ka jingdie doh masi 

Shillong, Jylliew 22:

Ka Butcher Association of Meghalaya (BAM) ha ka Sngi Palei ka la pynbna ban khang ïa ka jingdie doh masi mynta shipor.

Haba ïakren bad u President bad ka BAM, u Bah Esron Marweiñ, u la ong ba namar ka jingsheptieng ki paidbah ban thied ïa ka dohmasi namar ka jingpang Lumpy Skin Disease lane ka jingpang at snieh doh ha ki masi, ka BAM ka la rai ban pynbna paidbah ba kan sangeh ban ot bad ban die ïa ka dohmasi na ka bynta katto katne por.

U la kyntu ruh ïa ki para nongdie ba kin ïatreilang bad kumjuh ruh ïa kito kiba khaïi masi ba kin ym pat wanrah ïa ki masi kiba nabar shapoh ka jylla khnang ba yn lah ban tehlakam noh kham kloi ïa ka jingsaphriang jong kane ka jingpang at sniehdoh ha ki masi.

Ha kawei pat ka liang, ki nongdie dohmasi kiba die doh ha kylleng sawdong ka East Khasi Hills, mynta ka sngi ki la pynpaw ïa ka jingeh ha kaba ïadei na ka daw jong ka jingsheptieng jong ki briew ban thied ïa ka dohmasi. 

Ki la ong ba kane ka la buh jingeh ïa ki nongdie doh namar ka ïadie ïathied kam long shuh kumba ka long ha ki por ba la dep. Ki la ong ba mynta, ïa uwei u masi ki hap ban ïa phiah hapdeng bun ngut ki nongdie, hynrei ki don tang khyndiat ngut pat napdeng ki paidbah kiba wan thied ïa ka doh.

Shuh shuh ki la ong ruh ba ki thrang ba ka jingïadie ïathied kan long biang kumba ju long mynshwa khlem kano kano ka jingkhohñioh mynsiem.