Shillong, Jylliew 22:
U MDC ka BJP na Tura, u Bernard N Marak, ha ka Sngi Palei u la ujor da ka FIR pyrshah ïa ki kontraktor kiba pyntrei ïa ka PA Sangma Stadium ha Tura, West Garo Hills.
Ha ka FIR ba la ai ha thanat New Tura, u Bernard u la ong ba katei ka Stadium kaba don ha Dakopgre, Tura ka la shah ktah na ka jingtwa ha ka step jong ka Sngi Palei.
“Ka jingbym pyntrei ïa ka ha ka rukom kaba dei ka la wanrah ïa ka jingkhyllem wat hashwa ban pyndep ïa ka kam,” la kdew u Bernard ha ka FIR. U la ong ruh ba kane ka jingkhyllem ka long ka jingma na ka bynta ki briew kiba sah hajan jong ka Stadium bad kumjuh ruh ïa ki jingdon jingem jong ki.
“Kane ka jingjia ka pyni ïa ka jingbamsap bad ka jingshukor ïa ki paidbah. Ka don bun bah ka pisa ba la mang na ka Sorkar Pdeng lyngba ka tnat Minority Affairs ha kaba ïadei bad ka jingshna ïa katei ka Stadium,” la ong u MDC ka Tura.
U Bernard u la kyntu ïa ki pulit ba kin pdiang ïa katei ka FIR bad ban kem ïa kito kiba donkti halor ka jingkhyllem jong ka kynroh jong katei ka Stadium.
