Shillong, Jylliew 23:
Ka Associate Professor ka Indian Institute of Public Health (IIPH), ka Dr. Melari Nongrum ka la ïathuh ba katkum ka khana samari jong u snem 2011, ki don haduh 13.27% ki longkmie kiba kit khun-rei naba ha Ri-lum Khasi ki don 12.01%, ha Ri-lum Jaiñtia Hills – 16.33% bad Ri-lum Garo Hills – 13.96 %.
Ïa katei ka jingkheiñ, ka Dr. Nongrum ka la pynbna ha ka ‘Seminar’ ba kyrpang ba la pynlong da ka Meghalaya State Commission For Women (MSCW) ha ka Sngi Thohdieng halor ka phang, “Socio-Economic Status of Single Mother’s” kaba ka la long ha Conference Room jong ka State Convention Centre, Shillong ha ryngkat ka jingkyrshan lang jong ka National Commission for Women, New Delhi.
Ka Dr. Nongrum ka la ai ka jingbatai halor ka jingdon jong ki longkmie kiba kit khun-rei ne ki ‘Single Mother’ kam dei tang hapoh ka Ri India hynrei ha pyrthei baroh kawei.
“Ngi ïohi ba ki don da ki hajar ngut ki kynthei kiba long ki longkmie kit khun-rei bad ka jingbym don kurim kam dei ka jingpait jingpra ha ki longïing longsem hynrei ka lah ruh ban long ka jingkwah kaba lehse ka dei ka jingsngew ïapher ha ka imlang ka sahlang hynrei ka daw tynrai ba ka kynthei ka kylla long ka longkmie khlem kurim ka lah ban long na ka jingïap noh u tnga, ka jingïalait sanshyieng, ka jingkwah ban lait na ka jingshah leh beiñ ha u kurim bad kiwei kiwei ki daw,” la ong ka Dr. Nongrum.
Ka la ïathuh ruh hapoh Meghalaya katkum ka jingwad bniah la ïohi ba ka daw kaba kongsan eh halor ka jingbym don kurim ki kynthei ka dei ka jingïehnoh jong u lok ïa ka lok kaba pynlong ka jingkharoi ha ka jingklim lok.
Haba ai jingkren ha katei ka jingïalang, na ka liang ka Kong Delina Khongdup kaba dei ka dkhot jong ka National Commission for Women, New Delhi, ka la ong ba ka jingkiew jong ka jingdon ki longkmie kiba khlem don u kpa ka la nang kiew katba dang mih ki sngi ha ka Jylla.
“Ngi long kiba donbok ba hangne hapoh ka Meghalaya, ngi don ïa ka Meghalaya State Commission for Women kaba ai jingshngaiñ ïa ki kynthei, ym tang ka jingshngaiñ ïa ki kynthei hynrei ki don shibun kiei ki lad jingïarap,” la ong ka Kong Khongdup.
Ka la bynrap ruh da kaba ong ba ai ba kane ka jingïaphylliew jiingmut ha kane ka sngi kan ym sahkut tang ha ki saw kynroh jong kane ka kamra hynrei ban pynpaw pyrthei bad pyntip sha kiwei ki paidbah ruh kumjuh.
Ka Kong Khongdup ka la ong ruh ba kane ka kyntien ‘Single Mother’ ka dang shu mih ha kine ki khyndiat snem ba la dep kaba la mih na ki ri nongwei bad ka la ong ba ka long kaba donkam ban ïakren ïa ka daw jong kane ka jingbym don kurim jong ki longkmie bad kaei ka jingkthah kaba yn wanrah lada ki longkmie ki ri bad pynheh pynsan ïa ki khun tang marwei khlem u kpa.
“Na kane ka jinglong kmie kaba marwei ka mih shibun kiei-kiei ki jingpang ha kane ka imlang ka sahlang ka jong ngi bad bunsien ngi ïohi ba kine ki khun kiba ri tang ka mei lane u kpa, bun hi ki hap ha kino-kino ki jingpang kum ka jingbun ki jingmut jingpyrkhat bad ki kwah ban long marwei kaba pynlong ïa ki ba kim kwah ban ïadei bad ka imlang ka sahlang,” la ong ka Kong Khongdup.
