Shillong, Jylliew 23:
Hapdeng ka jingmih ki jingkylli bad jingartatien ïa ka rukom pyntrei kaba lah ban dei ka jingtrei torti, ka Sorkar Jylla lyngba ka tnat Sports and Youth Affairs ka la bteng ban ïada haba ïadei bad ka jingkhyllem ka kynroh jong ka PA Sangma Sports Complex ha Tura da kaba ai daw bad kynnoh ïa ka jingsahkut jong ka um ha ki nala. Kane ka la pynlong ïa ka um ban lang ha baroh kawei ka stadium khlem da ïoh ban tuid laitluid ha ka por bajur ka jinghap slap ha kine ki sngi.
“Na ki jingpeit thuh kiba la leh halor ka jinglong jingman, ki kdew ba dei namar ki jingtrei kiba dang ïaid shakhmat ïa ka Indoor Hall kaba nyngkong, bad ka Indoor Hall kaba ar, lem bad ka jingther u slap bajur bad jingsahkut ka um ha ki nala, ka la pynlong ïa ka um ba kan lang ha baroh kawei ka stadium, bad kane ka la pynlong ïa ka kynroh ba kan khyllem,” la ong ka kyrwoh ba la pynmih da u Commissioner & Secretary ka tnat Sports & Youth Affairs, u Vijay Kumar D.
U la ong ba ka jingpeit thuh kaba nyngkong da ka engineering wing jong ka State Sports Council halor ka jingkhyllem ka kynroh kaba dei jong ka madan phutbol ka la dep, bad ka kaiphod kaba pura la dep phah da ka Hindustan Steelworks Construction Limited.
La ong ba ym don ka bynta jong ka jingtei kaba wanrah kano kano ka jingsngewkhia namar kane ka jingjia.
Kumta khnang ban pynbeit kloi ïa kane ka jingeh kaba don, la ong ruh ba ki bynta kiba pynlong ban khang lynti ïa ka um ban tuid ha nala la khyndat noh mar-mar.
Shuh shuh la ong ba ki kam ban maramot shipor ki la ïaid shaid-shaid mynta da kaba buh da ki byrni kiba pyndap da u shyiap bad kiwei kiwei ki rukom pynskhem ïa ka kynroh la pynwandur bad pyntrei mynta.
“Tang shu kut ka aïom slap, ïa ki kam kiba pynskhem pura ïa ka kynroh yn sa leh noh bad baroh ki lad ki lynti dang shim kumno ban pyntikna ba ka stadium ïalehkai phutbol kan long kaba biang ban ïoh pyndonkam biang da ki paidbah kham kloi katba lah,” la ong u Vijay Kumar.
Ka P.A. Sangma phutbol stadium ka dei ka bynta jong ka P.A. Sangma Sports Complex ha kaba ïa ka phutbol stadium la plie ha u Nohprah, 2022.
Ïa ka Indoor Hall banyngkong kaba donlang ka jaka jngi bad jaka ïalehkai Squash, bad ka Indoor Hall kaba ar kaba don ka Badminton, Table Tennis, Basketball, ka jingtei ka dang ïaid bad dei ban pyndep ha u Nohprah 2024.
Haduh mynta ka jingkylli kaba mih ka long, hato ka jingtwa kaba la jia ka dei na ka daw ka jingtrei torti ka kompani ne kontraktor ba ïoh ban tei ïa kane ka kynroh jong ka phutbol stadium.
