Shillong, Jylliew:
Ka North East Students Organisation (NESO) kan pynlong da ka jingthang mombati ha man la ki nongbah jong ki Jylla ka thaiñ Shatei Lam-Mihngi (NE), ha ka 28 tarik mynta u bnai na ka bynta ban kyrpad ha ka ban wanrah noh ïa ka jingsuk ha Manipur haba kyntu ruh ïa u Myntri Rangbahduh ban keiñ noh ïa ka jingsngap jar. Ha ka kyrwoh, ka NESO ka la pyntip ba kan pynlong ïa kane ka jingthang mombati khnang ban kyrpad ïa baroh ba kin sangeh noh ïa ka jingïaumsnam khnang ba ka shongsuk shongsaiñ kan wan phai biang ha Manipur. Ka NESO pynpaw ïa ka jingsngewsih halor ka jingïai bteng ka jingïaumsnam hapoh ka jylla Manipur ha kaba ki ïing ki sem ki la shah pynjulor bad la duh ruh ïa ki phew tylli ki mynsiem briew. Katkum ka kyrwoh khubor na u Chairman ka NESO, Bah Samuel B Jyrwa bad u General Secretary, u M Thobu ki la pynpaw ïa ka jingsngewlem ïa ka jingmad jingeh ki paidbah ka jylla Manipur. Ki la wer ruh ban pynneh noh ïa ka shongsuk shongsaiñ bad ban pynsangeh noh ïa ki kam ïaumsnam ne jingpynjulor ïa ki jingdon jingem.
“Ka NESO ka kyntu ïa baroh ki nongshong shnong jong ka Manipur ba kim dei ban ngeit bad ban pynsaphriang ïa ki khubor thok ne ïa kino kino ki jingpyntip kiba nang pynsniew shuh shuh ïa ka jinglong jingman kaba don mynta,” la ong ki nongïalam ka NESO.
“Ka NESO ka dap da ka jingkyndit bad jingsngew lyngngoh ïa ka jingsngap jar-jar jong u Myntri Rangbahduh ka ri halor ka jingjia ha Manipur. Kane ka jingsngap jar ka jong u, kan nang pynjngai shuh shuh ïa ki riewlum jong ka thaiñ shatei lam-mihngi. Kumta ka NESO ka kyntu ïa u Myntri Rangbahduh ka ri ba un kren eiei, lym kumta ka sorkar pdeng ka don ïa ka jingthmu sha lyndet halor kane ka jingbym kren eiei,” la ong ki nongïalam ka NESO.
