Shillong, Jylliew 23:
U Chairman ka Regional Committee Ri Bhoi District uba dei ruh u Symbud Myntri Rangbah ka Jylla, Bah Prestone Tynsong u la ïathuh ba ha u Naitung ka Regional Committee na Meghalaya bad ka Regional Committee na Assam kin sa ïakynduh ban ïakren pynbeit ïa u pud u sam jong ka kylla ba-ar.
Haba ïakren bad ki nongthoh khubor hadien ba la wai ka jingïalang u Bah Prestone u la ïathuh ba ka sorkar Meghalaya kan pynkhreh ïa ki kot ki sla kiba biang ban pyni sha ka sorkar Assam ba kito ki shnong kiba don ha Assam kin hap noh sha Meghalaya khamtam ïa ka Block-2 bad kiwei.
U la ong ba ha ka jingpynbeit pud kin don beit kiba pyrshah kumba long ha ka kylla nyngkong, hynrei ka sorkar Meghalaya bad Assam ki la rai ban ïaid beit shakhmat ban pynbeit ïa u pud u sam khnang ban wanrah ïa ka jingsuk hadien habud.
Nalor kane, u la pynpaw ïa ka jingsngewkmen ba kito ki shnong kiba don ka jingïakajia bad ka Assam kin wanphai biang sha Meghalaya.
Ha kane ka jingïalang ka Regional Committee ha Secretariat la ïadonlang ki MLA na Ri Bhoi District, ki MDC bad u CEM ka KHADC, u Bah Pynïaid Syiem.
