Shillong, Jylliew 23:
U MLA barim ka NPP na Mylliem konstitwensi, Bah Hamlet Dohling uba long mynta kum u nongaibuit jong u Myntri Rangbah ka Jylla, u la ong ba ka Congress ka la thok ïa ki paidbah ha Mylliem tang ha ka por ilekshon ban kynnoh ba ka NPP ka dei ka seng kaba ïatreilang bad ka BJP. Hynrei kaba sngew lyngngoh pat ka long ba hadien saw bnai eiei ba la kut ka ilekshon kane ka seng ka la ïatreilang bad ka NPP ha KHADC.
Wat la u Bah Hamlet u dei u MLA barim ka NPP, hynrei u kwah ban pynpaw namar u la ïohsngew da ki shkor ba u kyrtong ka Congress na Mylliem konstitwensi, Bah Ronnie V Lyngdoh u la kynnoh beit ba ka NPP ka long kum ka BJP namar ka dei ka seng kaba la die lut ïa ki jaka sha khappud.
Nalor kata, u la ong ba ha ka por ilekshon ka Congress ka la kynnoh ruh ba lada phah jop biang ïa u Bah Hamlet ka NPP kan sa phah khang lut ïa ki ïingmane. Hynrei kaba sngew lyngngoh ka long ba mynta dang ïaid tang saw bnai kine ki briew kiba kren beiñ ïa ka NPP ki la leit ban ïatreilang bad ka NPP ha KHADC.
Kumta u Bah Hamlet u la ong ba phi lehkai ïa u paidbah, ki paidbah mynta ruh ki la stad namar ki dei tang ki kyntien ban pynbiej ha ka por ilekshon.
Shuh shuh u Bah Hamlet u la pynpaw ka jinglyngngoh ba u MLA ka Mylliem u dei u nongïalam ka liang pyrshah ha ïingdorbar thawaiñ, katba ha KHADC u ïatreilang bad ka NPP, bad kane ka jingleh ka Congress ka long kumba ka la kulmar jingmut.
Kum ban shu pynkynmaw, u Bah Hamlet u la wan balai ha ka ilekshon MLA ba dang shu dep namar ki paidbah ki la jied ïa u Bah Ronnie V Lyngdoh na ka seng Congress bad ka kyrtong na ka VPP ka la wan ba-ar.
