Shillong, Jylliew 23:
Ka Bharatiya Janata Party (BJP) ha ka Sngi Thohdieng ka la ong ba ka jingkren u President ka Congress, Bah Vincent H. Pala halor ka jinglong kloi ka seng ban thaw Sorkar bad ka MDA-2 ka long tang ban shu ïoh jaka ha ki lad pathai khubor.
“Ka jingkren u President ka Congress bad M.P. ka Shillong, Bah Vincent H. Pala ba ki long kiba kloi ban thaw Sorkar bad ka MDA-II kam dei kaei-kaei, hynrei ka jingpyrshang tang ban shu ïoh jaka ha ki lad pathai khubor,” la ong u nongaiktien ka BJP Meghalaya Pradesh, Bah Mariahom Kharkrang ha ka kyrwoh khubor.
U la ong ruh ba ka long kaba shai kdar ba ka Congress ka dei ka lieng kaba la sdang ngam khamtam hapoh ka Jylla bad ha kylleng ka ri baroh kawei, ïa kaba ka jingkhyllem jong ka yn ym lah ban ïarap da mano-mano.
Haba kdew ba ka Congress kam lah pdiang satia ba ka don shabar ka MDA-2, u Bah Kharkrang u la ong, “Ka jingkren jong ka Congress kam dei kaei-kaei hynrei ki buit pynïaphiah ban pyntlot ïa ka jingphai khmat, ka jingieid bad jingburom kaba u Myntri Rangbahduh ka ri, u ïoh pdiang ha ka rynsan jong ka pyrthei.”
U la ong ruh ba katei ka kdew shai halor ka jingtieng ka Congress ïa ka jinglong khuid bad ka jingbym pdiang satia ka BJP ïa ka bynta ba ïadei bad ka bamsap.
“Na bynta ka Congress, ka seng kaba la bna na bynta ki kam bamsap bapher-bapher, ka jingpynïaid ïa ka Sorkar ka bym bamsap ka dei kaei-kaei kaba phylla ïa ki,” la ong utei u nongaiktien ka BJP.
Nalor kane, u la ong ba ka jingangnud ka Congress ba kiwei kin ieh noh ïa ka BJP bad ka jingkwah ban ïatehlok bad ki ka long kamkai ïa ka jinglong-jingman ka politik jong ka jingïatehlok.
“Ki paidbah ka Jylla ki tip ba ka BJP ka long ka seng kaba khlaiñ bad kaba skhem ha ka Sorkar ïatehlok ka MDA-2 bad ka jingdon jong ka ha ka Sorkar ka ai bor ïa ka MDA-2 ban ïaid shakhmat bad ki mat treikam kiba long na bynta u paidbah bad ka roi ka par kum ka ‘agenda’ jong ka,” u la ong.
Shuh shuh u la bynrap ba ki nongshong shnong ki tip ba ka BJP ka long ka seng kaba donkam eh ha ka jingïatehlok ka MDA-2, ha kajuh ka por kaba khmih bniah ïa ka jingtreikam jong ka Sorkar, kumjuh ban pyntikna ba ki jingmang jong ki mat treikam ka Sorkar Pdeng ba la wanrah na bynta ka jingmyntoi u paidbah ki poi sha ki nongïoh jingmyntoi.
