Patna, Jylliew 23 (UNI):
Kumba 15 tylli ki seng kiba don ha ka liang pyrshah ki la ïakynduh ha Patna ha ka Sngi Thohdieng bad ki la kam ba ki la poi sha ka jingïasngewthuh jingmut ban ïakhun pyrshah ïa ka BJP ha ka ilekshon Lok Sabha ka ban long ha u snem ban wan.
Haba kynnoh ba ka sorkar ba la ïalam da ka BJP ha Delhi ka bteng ban ïuh roit ïa ka jingsynshar paidbah ha ka Ri, kitei ki seng ki la pyntip ba ka jingïalang kaba ar jong ki kan long ha nongbah Shimla ha ka 12 tarik Naitung.
Da ka jingshimkhia jong u Myntri Rangbah ka Bihar uba long ruh u nongïalam ka JD (U), u Nitish Kumar, ki nongïalam ba hakhmat jong ki 15 tylli ki seng ba kynthup ïa u President ka Congress, u Mallikarjun Kharge, u Myntri Rangbah ka Delhi, u Arvind Kejriwal, ka Myntri Rangbah ka West Bengal, ka Mamata Banerjee, u MP barim ka Congress, u Rahul Gandhi, u nongïalam ka NCP, u Sharad Pawar bad kiwei ki la ïashim bynta ha ka jingïalang mynta ka sngi ban ïathir halor ka jingpynkhreh na ka bynta ka ilekshon Lok Sabha.
Kiwei pat kiba la donlang ha ka jingïalang ki long u Myntri Rangbah ka Jharkhand bad nongïalam ka Jharkhand Mukti Morcha (JMM), u Hemant Soren, u Myntri Rangbah ka Punjab, u Bhagwant Mann, u Myntri Rangbah ka Tamil Nadu, u M K Stalin, ki Myntri Rangbah barim ka Jammu & Kashmir, ka Mehbooba Mufti (PDP) bad u Omar Abdullah (National Conference), u nongïalam ka Rashtriya Janata Dal, u Lalu Prasad Yadav, u nongïalam ka Shiv Sena, u Uddhav Thackeray, u Myntri Rangbah barim ka Uttar Pradesh bad nongïalam ka SP, u Akhilesh Yadav, u nongïalam ka CPI, u D Raja, u General Secretary ka CPI(M), u Sitaram Yechury bad u General Secretary ka CPI (ML) u Deepankar Bhattacharya.
Na ka liang u Nitish Kumar u la pyntip ba ka la don ka jingïabeit ban ïakhun lang ha ka ilekshon Lok Sabha ka ban long ha u snem ban wan. “Baroh ki nongïalam ki la pynpaw ba ka jingsynshar jong ka BJP kam long kaba hun na ka bynta ki paidbah bad kane ka seng ka pyrshang ban pynkylla wat ïa ka histori jong ka Ri. Ka BJP ka la pyrshang ruh ban pynkylla ïa ki jingshisha ha kaba ïadei bad ka jingïakhih ban ïoh jinglaitluid.”
“Ngi la rai ban ïakhun lang ha ka ilekshon bad ïa ki jingdonkam kiba bniah yn sa pynbeit ha ka jingïalang ka ban long ha Shimla,” la ong u Kumar.
Na ka liang ka Mamata Banerjee ka la ong ba baroh ki nongïalam ki ïa long kawei ban ïakhun pyrshah ïa ka BJP ha ka ilekshon. Ka la ong ba ka sorkar u Narendra Modi ka la pyndonkam bakla ïa ki kynhun tohkit kum ka CBI, ED bad Income Tax ban pyndik ïa kito ki briew kiba kren pyrshah ïa ka sorkar.
Hynrei ha ka jingïakynduh bad ki lad pathai khubor, ki nongïalam kiba khlem don ki long u Kejriwal, Mann bad u Stalin. Tangba na ka liang u Kumar u la kam ba kine ki lai ngut ki la don hapdeng ka jingkyrkieh bad ki la hap ban leit phai noh sha la ki jong ki jylla.
