Shillong, Jylliew 23:
Ka tnad pule-puthi lyngba ka State Education Mission Authority of Meghalaya (SEMAM) ka la ithuh ïa 942 ngut ki khynnah kiba la pep skul noh shiteng por bad ki ban sa pynrung biang (sha ka jingpule) ha ki shlem ai jinghikai jong ka National Institute of Open Schooling (NIOS) na bynta ka kyrdan pule ‘Secondary’.
Kum ban shu kdew hangne, ka jingpep skul shiteng por jong ki khynnah ha Meghalaya ha ka kyrdan pule ‘Secondary’ ka long 21.68% – kaba heh tam hapoh ka ri, ha kawei liang kaba kham heh shuh-shuh ban ïa kaei kaba long ha ka ri baroh kawei – 12.6%.
Kumta, kum shi bynta ban thaw ka lad ka lynti na bynta ka jingïoh ïashim bynta lang khamtam jong ki khynnah kiba la pep skul shiteng por bad ki bym lah ban ïadon bynta ha ki skul namar ki daw bapher-bapher, la ïasoi ïa ka soskular hapdeng ka SEMAM, Samagra Shiksha, ka tnad pule-puthi ka Sorkar Jylla bad ka NIOS ban ithuh ïa ki khynnah ki bym don ha ki skul ne kiba la pep skul shiteng por, kumjuh ban pynrung biang ïa ki sha ki shlem ai jinghikai jong ka NIOS.
Kane ka prokram kan long na bynta ka kyrdan pule ‘Secondary’ bad kan dei na bynta kito ki khynnah kiba la pyndep bad pep noh shiteng por ïa ka jingpule haduh klas VIII.
U Director ka School Education & Literacy (DSEL), uba dei ruh u State Project Director ka SEMAM, Samagra Shiksha, u Swapnil Tembe (IAS) bad u Prof. Saroj Sharma , Chairperson ka NIOS ki la ïadonlang ha ka jingïasoi soskular kaba la long ha ka 27 tarik u bnai ba la dep ha State Convention Centre, Meghalaya, Shillong.
Kumba ka long mynta, ka Jylla ka don tang 25 tylli ki shlem ai jinghikai (Study Centre) jong ka NIOS kaba kdup ïa 5 tylli ki distrik – East Khasi Hills, West Jaiñtia Hills, Ri-Bhoi, East Garo Hills bad West Garo Hills.
Na ka liang ka State Project Office ka la kyrpad ruh ïa ka NIOS ban kyntiew ïa ka jingdon jong ki shlem ai jinghikai ka NIOS hapoh ka Jylla ban kdup lang ïa kiwei pat ki distrik ba dang sah. Ka ophis ka la dep phah ruh ïa ka thup jong ki skul ba la ithuh na bynta ban pynïasoh bad ka NIOS kum ki shlem ai jinghikai.
Halor kane, ka ophis ka la dep shim ïa ka sienjam ban pynsaphriang jingtip lyngba ki lad pathai bapher-bapher ban ïarap bad kyrshan ïa ki khynnah kiba pep skul shiteng por kiba hapdeng ka rta 16-19 snem (kaba heh duh haduh ka klas XII) ban pynrung lyngba ka NIOS.
Ki khynnah kiba pep skul shiteng por ki ban sa rung sha ki shlem ai jinghikai ka NIOS ba la dep ithuh ki don 942 ngut.
Kine ki kynthup ïa 77 ngut na East Khasi Hills, 45 ngut na West Khasi Hills, 697 ngut na Ri-Bhoi, 30 ngut na East Jaiñtia Hills, 79 ngut na West Jaiñtia Hills bad 14 ngut na South West Garo Hills. Ka jingithuh ïa ki khynnah kan dang bteng ha kito ki distrik ba dang sah.
Haba ïadei bad kane ka liang, ki bor pynïaid ka tnad ki la pynpaw ïa ka jingsngewkhia namar ka jingdon jong ki khynnah kiba rung sha ki shlem ai jinghikai ka NIOS ka dang duna palat.
Ki la ong ruh ba kawei na ki daw lehse ka long ba ki khynnah kim da tip bha shaphang ka NIOS.
Shuh shuh haba kylli halor ka jingjyllei ka jingpep skul shiteng por ki khynnah ha ka kyrdan pule ‘Secondary’, ki la ong ba ka tnad kan sa leh ïa ka jingwad jingtip kaba bniah ban lap ïa ki daw tynrai halor kane ka bynta.
