Jowai, Jylliew 22:
Ka shlem treikam jong u District Child Protection Officer (DCPO), District Child Protection Unit, West Jaiñtia Hills District, Jowai ka la pyntip paidbah ba ha ka 22 tarik Jylliew la lap ïa iwei i khyllung kynthei ba la shah bret noh ha ki briew ki bym ithuh harud surok ha Krem Shohnoh, Mukhla, hajan Ummulong CHC ha ka por 3:40 baje janmiet.
Ïa ine i khyllung la ïoh tam da ki briew bad mynta i don hapoh ka jingpeit jingkhmih jong ka shlem treikam jong ka District Child Protection Unit bad Child Welfare Committee, West Jaiñtia Hills.
Katei ka shlem ka la pyntip ba kino kino ki briew lane ki bahaïing hasem kiba don ka jingtip ne kiba don ka jingïadei bad ine i khyllung ki lah ban pyntip sha ka District Child Protection Unit, Jowai da kaba phone ha u No. 9774878343 lane Child Welfare Committee, Jowai da kaba Ph.No.9436566556 lane sha ka Specialized Adoption Agency, Jowai da kaba phone ha u No.6009972453 na bynta ban wan mih bad shimti noh ïa ine i khyllung hapoh 60 sngi. Lada jia ba ym don kiba wan shimti hapoh kitei ka sngi ba la buh, ïa ine i khyllung yn pynbna katkum ka aiñ ba yn lah ban shah ting-khun noh ïa i.
