Shillong, Jylliew:
U Myntri Rangbah ka Jylla, Conrad K Sangma ha ka sngi Palei u la lum ïa ka jingïalang bad ki ophisar ka Ministry of Rural Development (MoRD) ban bishar bad khmih bniah halor ka jingpyntrei ïa ki skhim bapher bapher jong ka Ministry hapoh ka Jylla.
Ha kane ka jingïalang la pynleit jingmut ruh halor ka thong ha kine ki san snem ban wan ha ka ban kyntiew ïa ka imlang sahlang bad ka roi ka par ki nongshong shnong. U Conrad u la ong ba ka jingïakren hi ka long halor ki jingeh ba ïakynduh da ki paidbah ha ki shnong ki thaw haba ïadei bad ka jingpyntreikam ïa ki skhim bad ka jingkyrshan ba ka Ministry ka lah ban leh eiei ha ka ban weng ïa kine ki jingeh.
Haba pyntip ïa kane hapoh ka Twitter, u Conrad u la thoh “La pynlong ïa ka jingïalang bad ki ophisar ka MoRD, ka Sorkar India ban shong bishar ïa ka jingpyntreikam ïa ki skhim bapher bapher ka Ministry haba pynleit jingmut ïa ka thong na ka bynta ki san snem ban wan ha ka roi ka par ki shnong ki thaw bad ki nongshong shnong. Ngi la ïakren ruh ïa ki jingeh ba ki paidbah kila mad jingeh ha ki shnong ki thaw ban pyntreikam ïa ki skhim bad ka jingkyrshan ba ka Ministry ka lah ban ai ha ka ban weng ïa ki”.
Ha ka sngi Balang, u Myntri Rangbah u la lum ruh ïa ka jingïalang bad baroh ki Deputy Commissioner lem bad ki tnat bapher bapher ban ïakhmih ïa ki jingpynjulor kiba wan na ka jingïai hap u slap kynthup ka jingduh noh ïa ki mynsiem briew.
