Shillong, Jylliew 23:
Ka Executive Committee jong ka Khasi Hills Autonomous District Council (KHADC) ka la ai jingmynjur ïa ka Consideration of the Khasi Hills Autonomous District Council Service (Amendment) Rules, 2023 ha kaba la pynjlan ïa ka rta sha ka 37 snem ban rung kam ha KHADC.
U CEM, Bah Pynïaid Sing Syiem u la ong ba kane ka rai ka long katkum ka jingbud ryntih lang ïa ka rai jong ka Sorkar Jylla ban pynjlan ïa ka rta rung kam sha ka 37 snem, namar mynshwa ka rta rung kam ka dei haduh 32 snem ka rta.
Ka EC ka la pynlong ïa ka jingïalang kaba nyngkong eh hapoh ka jingïalam u Bah Pynïaid kum u CEM.
Ka EC ka la mynjur ruh ïa ka Introduction and Consideration of The Khasi Hills Autonomous District (Protection and Promotion of Khasi Traditional Medicine) (First Amendment) Bill, 2023 ha kaba kan don ka jingpynkylla khyndiat haba ïadei bad ka syrnot ban ai sha ki nongai dawai kynbat Khasi namar ha ka kyndon kaba rim kam da shai bha.
Nalor kane, ka EC ka la ïakren ruh ïa ka bill haba ïadei bad ka MDC pension. Hynrei la buhteng shwa bad lada donkam, kan don da ka select committee namarba ka don ruh ka mukotduma halor ka Pension Act ha Ïingbishar (High Court).
Ha kajuh ka por, ka EC ka la ïakren ruh halor ka dorbar mang tyngka kaba dei ban wanrah da u CEM ha ka sngi Saitjaiñ.
Ki don ruh ki aiñ-rew bad ki jingpynkylla ïa ki kato katne ki aiñ-rew kiba donkam ban leh.
U CEM u la ong ba ka EC ka la shim ruh ïa ka rai haba ïadei bad ka jingpyntrei kam ïa ka Trading by Non Tribal Regulation bad kan sdang noh shen ka jingkhynra trading license ïa ki nongkhaïi bar jylla ha ki jaka kiba hap hapoh ka jingpeit jong ka KHADC.
U la ong ba la ki kam ki dei kiba heh ne kiba rit, hynrei ki bym don ïa ka trading license yn phah khang noh ïa ki. Na ka liang ka EC kan bteng beit ïa ka jingkhynra, bad ki ophis jong ka Council kin sa leh ïa ka kamram.
