Mairang, Jylliew 23:
Ki runar kiba ym shym la tip la ki dei kiei ki la leit ban prong tuh ïa ki ar tylli ki ïing briew bad ar tylli ki dukan mar bam ha ka shnong Domkseh, Eastern West Khasi Hills kaba hap hapoh ka Mawthadraishan C & RD Block.
Ka khubor ka ïathuh ba ha katei ka jingjia kitei ki runar nalor ba ki la dep ban tuh na katei ka ïing, la suba ruh ba ki la thang dusmon ïa kawei pat ka ïing kaba la long trai da u Bah Pynshailang Marweiñ.
U Sordar ka shnong Domkseh u Bah Kyrshanborlang Hujoon u la ïathuh ba katei ka jingshah tuh ka lah ban jia ha ka step phyrngab jong ka 23 tarik Jylliew ha ki kynta ba pynlip bording.
U la ïathuh ruh ba kitei ki longïing kiba shah tuh ki dei kiba ym shym don ba sah mano mano bad ba ki trai ki dei kiba shu wan sah kai teng teng.
La ong ruh ba na ka liang ka shnong hadien ba la ïoh jingtip halor katei ka jingjia ka la pynlong ka jingïalang ban lap ïa kiba don kti hynrei ym shym la ïoh jingtip bad hadien kane ki la leit ban pyntip noh sha ki pulit ka thanat Mairang bad ki pulit ruh mar mar ki la leit sha katei ka jaka ban pynlong ïa ka jingtohkit.
