Shillong, Jylliew 23:
U Chief Executive Member (CEM) ka Khasi Hills Autonomous District Council (KHADC), Bah Pynïaid Sing Syiem u la pynpaw sha ki paidbah ka thaiñ khappud khamtam ki jaka ha Block-II kiba ju mad jingeh na ka por sha ka por ba ka Executive Committee (EC) kan long ka jingshngaiñ na ka bynta jong ki.
U la pynpaw ïa kane hadien ka jingïalang jong ka EC ha ka sngi Thohdieng ha kaba la rai ban leit jngoh ïa ki shnong ha khappud khamtam haba ka wat ba-ar jong ka jingpynbeit pud hapdeng ka Meghalaya bad ka Assam ka dang ïaid mynta.
U la ong ba ka EC ka kular ban shimkhia bha bad hadien ka dorbar mang tyngka, ka EC kan sa leit sha ki jaka khappud khamtam kiba ju shah pynthut ban sngewthuh bha da kaba sngap ïa ka jingïathuh jong ki nongshong shnong.
Nangta, u la ong ba u la ïoh ban ïakren bad u CEM ka Karbi Anglong Autonomous Council (KAAC) bad kumjuh ruh bad u MP ka Karbi Anglong bad pan ïa ka jingïatreilang ban wanrah ïa ka suk ka saiñ ha khappud khnang ba ki paidbah kin nym don ka jingsyier.
Nalor kata, u la ïathuh ruh ba na ka liang jong u, u la kren shai ba ka EC kaba thymmai kan ym ailad ïa ki bor district na Assam ban wan pynwit bad pynshong syier ïa ki paidbah jong ka jaitbynriew.
Haba phah ka khubor kaba shai sha ki paidbah kiba shong ha khappud, u la ong, “kane ka EC kan long ka jingshngaiñ na ka bynta jong ki paidbah ha khappud.”
U la ong ruh ba ka KHADC ka donlang ha ka Regional Committee kaba thaw da ka Sorkar Jylla ha kaba ma u kum u CEM bad u Dy CEM u Bah PN Syiem ki donlang ha ka Regional Committee ban mihkhmat ïa ka KHADC ha ka jingïakren.
Ha kawei pat ka liang, u CEM u la ïathuh ruh ïa ka rai jong ka EC ban pynkynriah noh ïa ki tnat treikam ka KHADC sha New Shillong. Yn kyrpad ïa ka Sorkar Jylla ba kan ai jaka khnang namarba ka shlem treikam kaba don ha ka jaka kaba mynta ka la khapngiah bad wanrah jingeh shibun.
U la ong ba ka EC kan sa thaw ïa ka komiti kaba khlieh da u EM ba peit ïa ka tnat Council Builing bad Council Assets ban ïakren bad ka Sorkar ban pan jaka bad kiwei ki jingdonkam jong ka Council haba pynkynriah ïa ka shlem treikam sha New Shillong.
