Shillong, Jylliew:
U Chief Executive Member (CEM) ka Khasi Hills Autonomous District Council (KHADC) u Bah Pynïaid Sing Syiem u la pynpaw ïa ka jingsngew pyrshah jur ïa ka jingdon jong katto katne ki jaka kynshew pisa (Bank) kiba khlem burom shuh ïa ka sngi kynmaw burom ïa u kpa ki dak thoh Khasi u Rev Thomas Jones.
Lah ban pynkynmaw ba ka 22 tarik u Jylliew ka dei ka sngi shuti ba la pynbna kyrpang da ka sorkar na ka bynta ban kynmaw burom ïa u Rev. Thomas Jones.
U Bah Pynïaid u la ong ba wat ha kane ka sngi shuti, ki la don katto katne ki bank kiba khlem burom satia da kaba plie beit bad pynïaid shakhmat ïa ki kam.
“Nga pynpaw ïa ka jingsngewkhia ba ki don katto katne ki Bank kiba la plie ïa ki jaka treikam ki jong ki ha ka sngi kynmaw burom ïa u (L) Thomas Jones uba long u kpa ka ktien Khasi bad uba wanrah ïa ki dak pule. Ka jingplie ïa ki jaka treikam ha kum kane ka sngi, ngi na ka liang ka KHADC ngi pyrshah jur,” la ong u Bah Pyniaid Syiem. U la ong ba ka Council kan shim khia ïa kane ka kam bad ka sorkar jylla ban pynthikna ba ha ki por ban wan kam dei shuh ban jia kumne.
