Shillong, Jylliew:
Ka VPP 17-North Shillong Constitwensi ka la pynpaw ka jingsngewnguh bad sngewsarong na ka bynta ki 32 ngut ki khlur ïalehkai Karate hapoh ka lama jong ka All Meghalaya Karate-Do Association (AMKA) kiba la ïashim bynta ha ka India Open International Karate Championship kaba la long ha ka nongbah Delhi, kaba la long ha ka 18 tarik Jylliew, ha kaba ki la lah ban wanrah ïa ka nam bad ka burom ïa ka jylla hi baroh kawei.
Kine ki la lah ban khur ïa 17 tylli ki takma kiba kynthup ïa 5 tylli ka takma ksiar, 6 tylli ki takma rupa bad 6 tylli ki takma rnong. Ka seng ka la ai khublei ruh ïa ki Coaches bad ki Manager kiba la ïalam ïa kine ki khlur ïalehkai ban ban poi sha ka nam bad ka jingjop. Ka seng ka la pynpaw ka jingsngewnguh ïa ki 5 ngut ki khlur ïalehkai kiba kynthup, ïa u Damebanmerbha S. Blah, Samebanmerbha S. Blah, Daphilahun M. Wahlang, Inlumlang Skhemiew bad Alferous Khar Syiemïong, kiba long ki nongshong shnong jong ka konstitwensi kiba la wanrah ïa ka nam bad ka burom.
