Jowai, Jylliew 23:
Uwei u briew la suba ba u la sdien phasi hapoh ka trok kaba don ïa u nombor AS01 KC 6574 kaba pynïeng harud ka surok ha Phramer, West Jaiñtia Hills.
Katkum ka khubor na ki pulit la ïathuh ba utei u briew la tip kyrteng kum u Pallab Bordoloi, 30 snem ka rta, na Quajari Goan, Morigoan District, Assam. Ki pulit ki ïathuh ba hapoh katei ka trok la lap ïa ka jingthoh ba la suba ka dei kata ka ‘suicide note’ lane ka jingthoh da utei u briew hashwa ba un phasi ïalade.
Ïa ka met jong utei u briew la pynkit sha Civil Hospital, Jowai na bynta ban leh ïa ka ‘post mortem’ bad hadien kane la aiti noh ïa ka met sha ki bahaïing.
